Камаллу келимаяр
Маракьлу келимаяр кхьинал машгъул Гьарун Агацарскийдин яратмишунар интернетдани машгьур я. Адан афоризмаяр дуьньядин маса чIаларизни таржума авунва. Ам камаллу келимайрикай ибарат “Акьулдин хенжел” ктабдин автор я. Агъадихъ чна адан келимайрикай бязибур кIелзавайбурун фикирдизни гъизва.
— Гьамиша са жувакай фикирдайдахъ халис юлдаш жедач.
— Эркекда эркеквал гадариз башламишайла, дишегьлиди дишегьливал гадариз башламишда.
— Зегьметди инсандиз фу гуда, кагьулвили инсан вич неда.
— Ахмакьдихъ галаз ахмакь хьана кIандач, амма ягьсуздахъ галаз ягьсуз хьана кIанда. Туьнтдахъ галаз туьнт хьун мажбур туш, амма хъсандахъ галаз хъсан хьун мажбур я.
— Зирек чандихъ зирек фикирарни жеда.
— Яшлу вахтунда ахмакь хьунни алчахвал я, жегьил вахтунда — руьгьдиз ажуз хьунни.
— Гьар хъсан кьуршахар кьадай кас сифте пис кьуршахар кьадайди тир.
— Хъсанвилиз садани акьван къимет гудач, хъсан инсанди хьиз.
— Уьтквем хьана, арабир кIаник акатун хъсан я, ажуз хьана гьамиша кIаник хьунилай.
— ГъвечIи къалмакъалдикай катзавайда чIехи къалмакъал битмишзава.
— Са гъалибвили — лувар кутада, гзаф гъалибвилери — кстахарда. Са кумукьуни (магълубвили) — тарс гуда, гзаф кумукьунри — телеф ийида.
— Халкьдихъ жанавурар тахьайла, къуьрер артмиш жеда.
— Жуваз гьуьрмет тийизвайдаз масабуруни гьуьрметдач.
— Суьруьдин кьил цIегь ятIани, ам кьиле тухузвайди чубан я.
«Лезги газетдин» 2020-йисан 16-нумрадай.
___________________________________________________________
Махачкъалада яшамиш жезвай Гьарун Агацарский Мискискарин хуьряй я. Ам тарихдал, яратмишунрал фадлай машгъул жезва. КьетIен кьатIунар, чирвилер авай ватанпересдин къелемдикай тарихдизни эдебиятдиз талукь маналу ктабар хкатнава: «Мискискарин тарих», «Акьулдин хенжел» ва масабур.
Гь. Агацарскийдин афоризмаяр Урусатда гзаф ктабра чапнава, дуьньядин маса чIаларизни таржума авунва. Ам Москвадин афористикадин клубдин членни я.
Къейд ийин, автордин бязи келимаяр 2020-йисуз «Лезги газетда» чапнай. Агъадихъ чна адан цIийи келимайрикай бязибур кIелзавайбурун фикирдиз гъизва.
Афоризмаяр
Жуваз берекат бул хьайила, четин вахтунда рикIел къвезвай кас рикIел хкана кIанда.
Гьар халкьдихъ вичин къуьрерни жанавурар ава.
Аялдиз чIуру тербия гун са тербияни гун тавунилай зиян я.
Бязибур Аллагьдихъ инанмиш жез башламишзава, жувахъ инанмишвал квахьайла.
Аллагьди инсан гьава, рагъ, яд, ахвар ва тIуьн авачиз яшамиш тежедайвал авунва, инсанди — пул авачиз.
Шадвилин бинеда авайди жибиндин гьал туш, келледин гьал я.
Инсандихъ еке буржар кьуд ава: Аллагьдин, диде-бубадин, Ватандин ва вичин аялрин вилик.
Инсан яш жердавайни акьуллу жедач, эгер адахъ уьмуьрдин тарсарикай менфят къачудай алакьун авачтIа.
Кьилел атанвайди гъвечIи бала ятIани, фагьум ая, ам чIехи бала тахьун патал атанвай хабар хьунни мумкин я.
Дишегьлиди рангар ягъайла, адан гуьзелвал артух яз аквада, итимди – пул пара къазанмишдайла.
Эвленмиш хьайила, папан тербиядик квай нукьсанар адан диде-бубадин тахсир я, эвленмиш хьайи са вад йисалай кваз хьайи тербиядин нукьсанар — адан итимдин.
Хуьруьн кавха хуьруьн тарих чидай кас хьана кIанда. Алатай вахтунин тарихдин къадир авачирдаз къвезвай вахтунин тарихдин къадирни жедач.
Бубади гафаралди тербия гуда, Аллагьди — тежрибадалди.
Чи уьмуьр чи бубайрин савкьат я чаз, абурун тIвар хуьн — чи патай абуруз чухсагъул.
Инсан, ихтилатдин са кьатI ван хьайила, муькуь кьатI вичи туькIуьриз алахъзава.
Аялди пачагьдин фикирар кьатIун чавай кьабулиз жезвач, амма инсанди Аллагьдин фикирар кьатIун — кьабулзава.
Урус чIалал рахадайла, и девирдин лезгидиз вич масабуруз савадсуз яз къалурун сад лагьай айиб кар я, аварвидиз — вич масабуруз рикI ажуз яз къалурайтIа.
Алатай вахтунин гьайифар чIугвада алай вахтунал рази туширда.
Эгер на ви шерикдиз еке ва гъвечIи ичер теклифайтIа, вуна нихъ галаз кIвалахна кIандатIа ваз чир жеда.
Бедбахтвал акурдаз хьиз бахтунин къадир масадаз чир жедач.
КIанивиле — пуд лагьайди, спортда — кьвед лагьайди, пул гудайнал — сад лагьайди садазни жез кIан туш.
Виликдай агъсакъалар кимерал ацукьдай, гила — интернетда.
«Лезги газетдин» 2025-йисан 7-нумрадай.
