Вад йис

 

Вад йис я стха завай къакъатна,

Вад йис я вилелай нагъв кими тежез,

Вад йис я за ви зенг вилив хуьзава,

Вад йис я стха завай къакъатна.

 

Алатдач зи а югъ садран рикIелай,

Стха амач лагьанай заз зенгинай,

Ивид стIал кIвахьзава зи рикIикай,

Вад йис я стха завай къакъатна.

 

Кьве гъил хкажна, лугьуда за:

«Я Аллагь, ваз язух атаначни,

Жегьил чан вахчудайла?» —

Вад йис я стха завай къакъатна.

Аси жемир, лугьуда заз вирида,

Ам Аллагьдин кьадар-кьисмет я.

ЯтIани зи рикI  жезвач секин,

Вад йис я стха завай къакъатна.

 

РикIел хквез аял вахтар,

Вучиз икI фад чун чIехи хьанай?..

Ацукьнава ви сурун кьилихъ…

Вад йис я стха завай къакъатна.

«Лезги газетдин» 2024-йисан 42-нумрадай.