Советский хуьр

Ви вегьейла, шегьре рекьер,

Кьуд пад къацу багълар, чуьллер,

Мадни гуьзел яргъи уьмуьр

Гурай ваз зи Советский хуьр!

 

Дараматар халкьдиз герек,

Къуллугъдава ийиз куьмек,

Алай вичел шегьердин экв,

Авадан хьуй Советский хуьр!

 

Серинарни къайи ятар,

Гьар камуна — туьквен, базар,

Вун шегьердиз хьанва ухшар,

Берекат хьуй, Советский хуьр!

 

Ава ина шумуд миллет,

Арадавай дуствал, гьуьрмет,

Къуй Аллагьди гурай нуьсрет

Гьар камуна, Советский хуьр!

 

Авай хуьр я даим мугьман,

Кьегьал рухвайрин я макан,

Агалкьунар хьурай кьакьан,

Тарих авай Советский хуьр!

 

Емиш-майва — булдалд бегьер,

Гьар са кIвале мелни мехъер,

Алай къадим лезги чилел

Ватан я зи Советский хуьр!

«Лезги газетдин» 2022-йисан 28-нумрадай