Зи хайи хуьр
Зи Лекьендин рикI —
Кьакьан рагар тик,
ЦIигел я, шерик,
Зи хайи Кьуьчхуьр.
НикIерни чуьллер,
Зегьметкеш гъилер,
МискIинар, муькъвер
Авай хуьр Кьуьчхуьр.
Зи аял вахтар,
КIамун ван, ахвар,
Дидед гай афар —
Зи хайи Кьуьчхуьр.
Тарихдин хирер,
Дерин тир сирер,
Сурарни пIирер —
Зи хайи Кьуьчхуьр.
Ажеб я кьисмет —
Ятар, бул девлет…
Къе етим, хевлет,
Зи хайи Кьуьчхуьр.
Аслан бубад кIвал,
Чирай дидед чIал,
Вал атанвай гьал?..
Зи хайи Кьуьчхуьр.
Чиди я тахсир,
Хуьн тавур а хуьр,
КIвалер жезмач чир,
Зи хайи Кьуьчхуьр.
Лукьманрин карван,
ПIирерин макан,
Заз гьакьван я кIан!
Зи хайи Кьуьчхуьр.
Саидан ватан —
Чи руьгь, дин — иман…
Чун ваз мад — мугьман,
Зи хайи Кьуьчхуьр.
03.11.2013
Къейс муаллим!
Виридав ви къени рафтар,
ХъуьчIуьк жедай ктаб — дафтар.
Куьре, Самур — ваз бул дустар.
Машгьур кас тир чи Къейс муаллим!
ТIебиатдин тир хьи савкьат,
Хуш къилихни гуьзел къамат.
Чаз илим чириз гьакъикъат,
Гьулданрин сир чи Къейс муаллим!
Чи гадайриз тир вун даях,
Ви тарсар чаз герек саягъ.
Ажайиб кас, гвачир дамах,
Михьи, магьир чи Къейс муаллим!
РикI кудай на гьар лезгидихъ,
Къуьн кутаз гьар са дердидик.
Садни тунач вуна гъарикI,
Кар гьалтайла, чи Къейс муаллим!
Вун хьтинбур, ава тIимил,
Халкьдихъ рикI куз, идай майил.
Милайим хъвер, хесет — къизил,
Халис дагъви чи Къейс муаллим!
И гафар вав, чан аламаз,
Агакьариз кьисметнач заз.
Амач лугьуз ван хьайла чаз,
Кур дерт хьана, чи Къейс муаллим!
Къунши Зиямуллагьаз
Икрагь хьанва ракьарикай,
Агал тежер ракIарикай,
Вучин ихьтин устIаррикай?
Себеб жезвач, Зиямуллагь!
Бизар хьана, такьаз икI худ,
Мад капотдиз вегьезва гъуд.
“УстIарар” килигна шумуд,
Кьил акъатнач, Зиямуллагь!
Къунши Замир — чIехи устIар,
Гьадавай куьз кьадач хабар?
Зегьримарди ийиз рикI тIар,
Худ кьазавач, Зиямуллагь!
Шамсудина ийиз буксир,
Ваз куьз авач адан къадир?
Гьадаз чизва машиндин сир.
Ваз лугьузвач, Зиямуллагь!
Ремонтдай пул къвемир гьайиф,
Машиндикай жеда ви лиф.
Аккумулятор хьанва зайиф,
Куьз къачудач, Зиямуллагь?
Гуз кIанзава ваз са куьмек,
Лагь затI аван завай герек?
А машиндив за вун гьелек
Ийиз тадач, Зиямуллагь!
Кьуьчхуьр Фазил — зун ви къунши,
Валлагь, ви “РАФ” хьанва кьуьзуь.
“Газель” къачу, гана вири,
Чара авач, Зиямуллагь!..
Гьахъ паталди…
Къуллугъхана хьана чаз “кIвал”.
Гьич фу недай амач мажал.
Минет хьурай, акъудмир къал,
Я чIехиди, я Хан Агьмед!
Чи кIвалахдин хьурай къадир.
Зунни Анвер яни тахсир?
Фитне извай иблис кафир,
Ам шейтIан я, я Хан Агьмед.
Чун вири лап хьанва бизар.
Туба хьуй мад Ирчид базар.
“Газель” гьалдай жагъур устIар,
Минет — аман, я Хан Агьмед.
ГъвечIибур къвез хьана чIехи,
Зун къуллугъдал хьана рехи.
Заз килигиз вун пис терси.
Бес икI жедан, я Хан Агьмед?
Рахуникай авач файда,
Чна къанун хуьда къайда.
Гьелегьар кьаз акьван зурба,
Чак тахсир кван, я Хан Агьмед?
Вунни тушни гьа Куьредай —
Чун чIехи хьай са уьлкведай?
Мийир на кар чал хъуьредай,
Делил аван, я Хан Агьмед?
24.02.09
Низ чидай?
Пиян итим за хутахун —
Адан паб зал хьана къудгун.
Низ чидай икI кьабулун чун,
Итимдиз капаш хьана хьи.
Заз кIан хьана са меслягьат,
Секиндаказ гун насигьат.
Акъудна тамам къиямат,
Ина са тамаш хьана хьи.
Зи гафуниз гузвачир яб,
Итим кесиб хьана татаб.
Зарпанд алатай хьиз тир паб,
Зун кьулухъ яваш хьана хьи.
“Я вах, садра яб це на заз,
Гьакъикъат за ахъайин ваз.
Алачиз, экъуьгъиз рахаз,
Вазни къе са яш хьанва хьи…
Язух хьана заз ви итим,
Куьчедал ярх хьанвай етим,
КIвачел аруш хьанвай са сим.
Заз чидай къардаш хьана хьи.
Дуьшуьш хьана зун хатадай.
Вун вуч паб я, икI рахадай?
Вил авач итим аквадай,
Ам гьакьван кIамаш хьана хьи?..”
Хъсанвализ фейи Фазил,
Гьакьван пашман хьана сефил.
Лап беладик кутуна кьил,
Дарих жез, кармаш хьана хьи!
Мектебдин рекье
Гьич галатун чидачир заз,
Хъфидай зун гьакI гьевес кваз.
Дагълар, кIамар тушир четин,
Экуьн кьудаз — рекье хъуьтIуьн.
Жив къвана, рехъ жедачир чир.
Я къван-къумбак, кIвачин жигъир.
Ксанваз хуьр, яргъандик кваз,
Ахвар авачир тек са заз.
Пуд муькъвелай физвай зи рехъ,
Чир жедачир муькъуьн къерех.
Сад Аллагьди хуьзвай, заз чиз,
Йифен рекьяй текдиз хъфиз.
Гьалтда ничхир, жеда дуьшуьш,
ХъуьтIуьн цикIиз аяз къизмиш.
КичI авачир са кIус, валлагь,
Шукур хьуй ваз, зун хвейи Аллагь!
16 версин рехъ тир яргъал,
ВацI акъвазна, жедай бейгьал.
КьецIил кIвачер — муркIад вацIал,
Лап акъатдай кIарабриз тIал…
Кьежей кIвачер, алукI къапар,
Хер акъатна, куз жедай тIар.
КIелда лугьуз, заз хьайи къар,
Гьич рикIелай фич а йисар.
Сагъ хьуй, Кьурагь, ятIани вун,
Гьич пашман туш Кьуьчхуьрви — зун.
Гияр шегьер авадан хьун,
Эрзиман я мадни акун…
Чи дагълара
Пак михьи тир пIирер аваз,
Такабур Кетин дагъ акваз,
Сува гатуз кIвалах ргаз,
Жедайди тир Кьуьчхуьр дагълар.
Агъзур гектар ядай векьер,
Тамал кIамуз машинд рекьер.
Суьруь-суьруь хипер, кIелер,
Ван ацалтна, Кьуьчхуьр дагълар.
Жегьил-жаван — жерге-жерге,
Чанта, дергес кьуна къуьне,
Ашкъи — гьевес аваз рикIе,
Язавай тир Луцах гуьне.
Хкведайла мани — мецел,
Шад ван жедай хуьруьн кьилел.
Гьа вахтар хтайла рикIел,
Дарих жезва, Кьуьчхуьр дагълар.
Армиядай дустариз чар
И пад — Китай, а пад — Япун,
Эрзиман я заз куьн акун.
Кьве йисалай хкведа зун,
Гуьзлемиша азиз, дустар!
Къуллугъдикай за вуч кхьин,
Дуьньяд гьалар къуй хьуй секин.
Ахъайдай хьи за квез якъин,
А кар туш квез течиз, дустар!
“Яргъал Восток” я къариблух,
Пара туш аскердин дуллух.
Аяз кваз акъатда саврух,
ГьикI я ина квез чиз, дустар!
Им зи бурж я, ийиз къуллугъ,
Хъсан я зи кефи, сагълугъ.
Къаравулда квач зак шулугъ,
Маса къайда течиз, дустар!
Садалайни чун туш зайиф,
Кьисмет тахьуй дяведин циф.
Чанни гуда, къведач гьайиф,
Ватан патал михьиз, дустар!
Гьар экуьнахъ аквада рагъ,
Гатуз инаг я къацу багъ.
ГайитIани тавни утагъ,
Хкведа зун хуьруьз, дустар!
Бязибур — чагъа — “молодой”,
Къалурда чеб яз “деловой”.
Зунни ава лап “боевой”,
Зарафатриз, кефиз, дустар!
И яргъай за кхьей чарар,
Зи дустарин аваз тIварар,
Ярудалди чIугваз цIарар,
Лайих я лап хуьниз, дустар!
* * *
Къимет амач кIел-кхьинихъ,
Чирвал авай пешекардихъ.
Инженеррихъ, алимарихъ
Авайд гьакIан тIвар хьана хьи!
Луту, къучи гьатна кIвенкIве,
БарбатI изва вири уьлкве.
Алимар гьич амач виле,
Пешекар бейкар хьана хьи!..
«Лезги газетдин» 2021-йисан 37-нумрадай.
