— Диде-бубадин мурад камаллу веледар ва абур бахтлу хьун я.
— Камаллу дишегьли авай кIвале вири жеда: сиришта, фу-яд, михьивални, чимивални.
— Акьуллу, дуьзгуьн паб гьалтай итим кьуьзуь жедач, амма девлетлу жеда.
— Аялар авачирди хизан туш.
— Аял авачир кIвални яд галачир регъв сад я.
— Аялдихъ галаз мецелди рахух, сабурлувилелди гъавурдик кутур.
— Аял такIан инсан начагъ, кефсуз я.
— Аялар гзаф авай хизан бахтлуди я.
— Аялар диде-бубадин лувар я.
— Велед ава — хизан ава, велед авач — хизанни авач.
— Гьар са аял диде-бубадиз са рагъ я.
— Гьуьрмет авай хизанда адалатни жеда.
— Диде шириндаз хайи чилни ширин жеда.
— Диде-бубадиз вафалу хьун веледрин буржи я.
— Мехъер авун четин туш, кар кутугай свас жагъунал ала.
— Ферли веледар диде-бубадин рикIин хиял я.
— Сусан тарифарда, чамраз акьулар гуда.
— Сусанди — цIийи кIвал, кIвалинди — михьивал.
— Суфрадал са къабни тIур артух гъида: белки, мугьман — итим атайтIа.
— Тавдин кIвал — мугьмандиз.
— ТакIанвал квадра, кIанивал хуьх.
— Таб квай хизанда я гьуьрмет жедач, я — берекат.
— Тербия, адалат авай хизандай акьуллу, такабурлу аялар акъатда.
— Фад мехъер авурдаз хцикай стха жеда.
— Фитнеди хизанни барбатIда, хуьрни.
— Фу-бубадив, берекат дидедив жеда.
— Хайи стхайризни гьардаз вичин муг кIанда.
— Берекат, гьуьрмет авай хизанда аялри чпи чеб хуьда.
— Хизандин кIвачел свас элкъведа.
— Хизан авай итимдик азарар акатдач лугьуда.
— Хизан къени хьайила, хуьрни къени жеда.
— Хизан хуьдайда хуьрни хуьда. Хизандивай къакъатайди гару яда, хуьруьвай къакъатайди хару.
— Хизандихъ — кьил, папахъ гъуьл кIанда.
— Хтулни штул чIехи бубадин мецелди рахада.
— Хва бубадиз гуьмбет я.
— Хизан гъвечIи гьукумат я: адан пачагь — буба, везирни диде я.
— Хизан кIандайдаз — хуьр, хуьр кIандайдаз ватанни кIан жеда.
— Хизанда пуд аял са бубат я, вад аял — берекат, ирид аял — гьерекат.
— Хизандал меслят гъайи кар кьилиз акъатда.
— Хтул баладилай са шумудра артух, гзаф кIан жеда.
— Хтул акьалтI тийир лезет я.
Гьазурайди — Шихмурад Шихмурадов, ЛГ-дин 2018-йисан 20-нумра
