Аслан даим ксанайтIа

 

Йикъан норма тIуьна кьве къат,

Вичин масан чан саламат

Хуьн паталди геж вахтаралд,

Аслан фена хуш ахварал.

Виш жуьредин ахвар акваз,

Гагь элекьиз, гагьни дакIваз,

Экъисзавай кIирер вичин

Ада, хъвериз, гьам чIуриз чин…

Аслан ксанваз акуна,

Адан вилик, кичIела, чIар

Вегьезавай гьайванри къе

Кьуьлерзавай, элкъуьрна цIар.

Уьмуьр пеш хьиз, зурзаз-зурзаз

Фейи Къуьрез аквадамаз

Тама авай и хвешивал,

Ахъа хьана адан мез-чIал:

— Ахварик кваз тIуьрай вичиз

Вири дуьнья — вил ацIур кьван.

КсанайтIа даим Аслан,

Гьикьван азад жедай Ватан!..

 

ТIиб-ТIаб

 

ТипIре вичел тапшурмишай

КIвалах кьилиз акъуднач.

Вахтар фена,

Пехъре анив

Гьич са касни агуднач.

ТипIрен къавум ТIаб атана

А къуллугъдал акьахна,

Варзни фенач арадай гьич

КIвалахар мад какахьна.

Гагь ТIиб хьана гьа къуллугъдал,

Гагь ТIаб хьана чIехиди.

Пехъре тунач а чкайрал

Гьа кьведалай векъиди.

Йисар физва…

Пехъре ТIиб,

ТIаб вичин дуст яз

Кьаз ама.

Гьавиляй и идарада кIвалах чIуруз

Яз ама!

 

ТипIрен хиял

 

МичIи йифиз тарцин кукIва

Ацукьна ТIиб.

Хиялрик кваз,

Дуьнья такваз

Амукьна ТIиб.

“Мад садрани дуьньядиз

Ракъинин нур такурай.

ТIебиатдин чинани

Яру эквер такьурай.

Дагълар, тамар хьурай хелвет,

Ярай элди зи вилик мет!”

ТIиб гьа ихьтин хам хиялрик

Квай чIавуз,

Хкаж хьана хъуьрез-хъуьрез

Рагъ цавуз!

 

Тамукай хъелна…

 

ЧIехи тамун юкьни-юкьва,

Чуьхвер тарцин кIукIни-кукIва

Чка кьуна Севре вичиз,

Ацукьнавай, чуьхверрикай

Вичин сивиз

Са-сад вегьиз.

Хана бирдан,

Са хел тарцин,

Аватна Сев цел хьиз чилел,

Са чIавалай уфиз, пуфиз,

Къарагъна ам са гьал кIвачел.

Харуз хвенвай аялди хьиз,

И тамукай авуна хъел.

Там эсиллагь хабарсуз тир

Чуьхвер тарцин хел хуникай.

Там эсиллагь хабарсуз тир

Сев вичикай хъел хьуникай!

 

Ваъ, за акIдач…

 

КIекер са-сад фермадин

Нез ацукьна рагъул СикI.

Мад кIвалахриз яб тагуз,

Хьана темпел, кагьул СикI.

Ревизия атана,

СикIрел зиян атIана.

Ахпа туьгьмет алкIурна,

Фермадилай чукурна.

СикIрен къуллугъ гъиле кьур

Чакъалди икI лагьана:

— Ахмакьвална, СикIре хьиз,

За кIекерик хкIадач.

Амма гьа и фермада

Верчерикай сад тадач!

 

ПIинияр вучиз яру хьана?

 

ГьикI ятIани рекьин мугьман

Атана са пIинид тарцин

КIаник йифиз  ксана.

Къал къачуна пIинийри фад:

“Вучиз фена, кьуьзуь кафтар,

Ксузвач са масана?”

Югъ жедалди пIинийрин

Ягьанатар ифена.

Гьа и чIавуз кьуьзуьди

Яваш-яваш хъфена.

Хъфизвайди пIинийриз

Багъманчи тирд чир хьана,

Регъуьвиляй кефияр

Сад лагьана чIур хьана.

И йикъалай пIинийрин

Чин яру яз амукьна,

Багъманчидин суфрадал

Гьар гатфариз ацукьна!

* * *

Инсаният физва вилик датIана,

Гелер таз-таз чинал кьуьзуь тарихдин.

Бязибуруз кIанда рекьер атIана,

Чпиз къачуз ал тIаратIар тарифдин!

* * *

Лекь рагарин, цIегь синерин иес я,

Абурун тIвар кьадач дагълар  галачиз,

Гьабур дагъдин, дагъ гьабурун иес я,

Дагълар гъарикI жеда абур авачиз.

«Лезги газетдин» 2022-йисан 50-нумрадай.