Сад я Самур
Дагъустанни Азербайжан —
Са лезги чил кьве пай хьанва.
Самурдин яд — лезгийрин чан
Чаз, Къурушриз, яргъал хьанва.
Кьве пай хьанвай лезги халкьар,
Чун са тарцин хилер тушни?
Лезгистандин кьакьан дагълар,
Къуруш дагълар кьилер тушни?
Терекдин яд, Сулакдин яд,
Гьардахъ вичин са тIям ава.
Самурдин яд — дуьньядин дад,
Лезгистанда чаз гьам ава.
Куьре, Къуба, Дербент (Кьве Вар),
Лезги халкьдин яд я Самур.
Ахцегь, Хачмаз, Кьурагь, КцIар
Сад хьайила, шад я Самур.
ЦIийи Къуруш
Куьч хьана чун кьакьан дагъдай
Зур асир я и чилерал.
Цуьк акъудна цацар “багъдай”,
Къуруш халкьар, куь гъилерал.
Кьабулна чун гьуьрметдивди,
РикI ахъайна и чилери.
Девлет булна зегьметдивди,
Цуьк ахъайна чи никIери.
Зегьметчи халкь, девлет аваз,
Абад я къе хайи Къуруш.
Дагъустанда гьуьрмет аваз,
Вун шад я къе, ЦIийи Къуруш.
Къуруш халкьар — лезги халкьар,
Зегьмет кIани эллер я куьн.
Къуруш халкьар — хайи халкьар,
Шагь дагъларин мекер я куьн.
Дуствал
Салам гана, дустар гъилер чуькьвейла,
Сад жигеррай садан жигер ифейла,
Гьуьрметдивди кьведан вилер хъуьрейла,
Дуствал даим пак ниятрин бине хьуй.
Чин чуьхуьда гьар экуьнахъ инсанди,
Йифериз чирк твадайвиляй шейтIанди,
Дустунилай фитнеярда душманди,
Дуствал мягькем, чукIур тежер къеле хьуй.
Рагъ такьуна, емиш жеда — дад жедач.
Сагъвал авач, девлет хьуналд шад жедач.
Дуст авачиз вердиш хьайдаз гад жедач,
Дуствилин гьисс гьар са касдин рикIе хьуй.
Дуст я къаншар экуь тариф ракъиниз,
Яб це, дустар, Лезги Ариф рахуниз,
Гаф авай туш стха хьтин дустуниз,
“Дуствал” лугьур гаф гьамиша вине хьуй.
Яры-Дагъ
“Яры-Дагъдин” устIарриз,
Къалурзавай гьунарриз,
Акур жуьре вилиз зи,
Хуш хьайивал рикIиз зи,
ЧIехидалай эгечIна,
ГъвечIидалай хкечIна,
Шиир дагъдин яд хьтин,
Чими август гад хьтин,
Кхьизва за ачухдиз,
Тариф тийиз артухдиз,
“Яры-Дагъдин” тIвар алай
Карханадин зар алай.
ЗатI алачир чкадал
Хсусият арадал
Гъайи касдин тариф на
ГьикI ийидач, Ариф, на?!
Бахтунай хьиз гайиди,
Хесетриз вич къениди,
Зегьметдиз хъвер гьахъ гудай,
Гьиллебазриз ваъ лудай.
Дараматрал, кIвалерал,
ВацIарални муькъверал
“Яры-Дагъдин” кар ала,
Бул зегьметдин пар ала.
Дидедин чIал — девлет хуьз,
Ктаб, журнал, газет хуьз.
Куьмекдин гъил яргъи я,
Бубадин хва лезги я.
Эдебият Къурушрин
Яру дагъдин кукIушрин
Шагьвар хьана винелла,
Вун, куьмек яз, рикIелла.
ЦIийи кIвалер туькIуьриз,
ЦIийи эквер куькIуьриз,
Заказар мад бул хьурай,
Карханадиз дул хьурай…
Ачухна, зун рахан, туьд:
Работникрин цIудай кIуьд
Хайи халкь я, багъри я —
Ватанэгьли лезги я.
Коллективда дуьз къайда
Аваз, кардихъ жез файда,
И рекьяйни “Яры-Дагъ”
Сад тирвиляй язва сагъ.
Гъилевай кар ахпадиз,
Къенин кIвалах пакадиз,
Вегьин тийиз гьар гъилиз,
Акъудзава кар кьилиз.
Кардин сирер танишбур,
УстIарар чеб вердишбур.
Коллектив яз са нехиш,
Хьанва инсан тупламиш.
Гьам фяле, гьам прораб,
Еридизни гуз жаваб.
Гьам мастер, гьам инженер
КIвалахда я чеб лекьер,
Къадир чирбур зегьметдин,
Сагьибар чеб гьуьрметдин.
… “Яры-Дагъдин” устIарриз,
Лагьай мани гьунарриз,
Са-садан тIвар кьуна за,
Сад кьвед, белки, туна за,
Бейкеф са кас аватIа,
Вични инал алатIа,
Тавакъу хьуй, багъиша,
Хъел хъуьруьнив дегиша.
Лезги Ариф чIал лагьай,
“Яры-Дагъдал” кар алай,
Шиир гъана эхирдиз,
Тахьуй садни сефилдиз…
Халкь паталди
Гьуьрметлу тир Къуруш халкьар,
Куьн патал я къенин хабар:
ЦIийи газет — рикIин чIалар
Атанва къе халкь паталди.
Ширинвал гваз лезги чIалан,
Гьайбат аваз дагъдин кьакьан,
“Къурушрин сес” багьа мугьман
Атанва къе гьахъ паталди.
Чи виридан сад я фикир,
Авадан хьун чи хайи хуьр,
Газет, чидай кардин къадир,
Атанва къе халкь паталди.
Пис кардикай гьайиф чIугваз,
Хъсан карда зериф акваз,
Дуьз крарин тариф акваз,
Атанва къе, халкь паталди!
“Къурушрин сес” сефер сагъ хьуй,
КIвач эцигай рекьер сагъ хьуй,
Шад яз, экуь рекьер сагъ хьуй,
Халкь паталди — гьахъ паталди.
«Лезги газетдин» 2022-йисан 51-нумрадай.
