Чигер кьуна кузвай мекве…
Ильман Субгьанович Алипулатов — лезгийрин тIвар-ван авай журналистрикай — публицистрикай сад, яргъал йисара Дагъустандин телевиденида лап кар алай программаяр — “Чи почта”, “Ракурс”, “Акценты” кьиле тухузвай редактор, ДГУ-дин журналистикадин факультетда электронный СМИ-рин кафедрадин заведующий, илимрин кандидат, общественно-политический деятель яз, течидай кас Дагъустанда бажагьат гьалтда. Алай вахтунда ам РД-дин Халкьдин Собранида лап ихтибарлу депутатрикайни сад я. Республикадин ва халкьдин вилик адан лайихлувилер хейлин чIехи шабагьралди, гьуьрметдин тIвараралди къейднава.
Амма шаирвал… Вичи ада вич шаир я садрани бажагьат лагьана. Амма дустарин арайра, бязи шадвилин мярекатрал ам анжах шиирралди рахада. И карди раижзавайвал, шиират адан кьвед лагьай нефес, гьевеслувал хьиз я. Вичини урус чIалал кхьизва.
Чи гъиле адан эсерар нубатдин са юбилей къейддайла гьатна. Абурухъ философиядин дерин гьиссер, рангарин икьивал, руьгьдин жумартвал ва жанлувал авайди гьасятда гьиссда. Чна абур лезги чIалални рахурун кьетIна. Ингье куь вилик са шумуд чешне ква.
Мерд Али
___________________________________________
Хъел
Чун йифева, гумада хьиз,
Вун хъфена. Вучиз? Гьиниз?
Килига ман вуна кьулухъ,
ГьикI ийизва рикIи къуллугъ!
Зун экверин гьалкъадава,
Гуьгьуьл туькьуьл накьвадава.
Я инсанар! Хьухь квез зи ван,
Гьалкъа алуд залай залан!..
ИкI жеда кьван. Хъиле туькьуьл
Незва зи чан, незва гуьгьуьл.
ЯтIани жув хуьх на секинз,
Лугьумир ваз рехъ я четин.
ВикIегьвала, хвена умуд!
Ихьтин йикъар хьана шумуд…
Хъел цIрада, къведа гьайиф,
Кьамир, я кас, на жув зайиф.
Эквери ваз гуда куьмек,
Тадач хъиле вун ялгъуз, тек.
Йиф рахада вичин саягъ,
Лампа ятIа, амачир ягъ?..
Гудач ада ерли жаваб,
Артухариз чандиз азаб…
Инсаф гьикьван жеда герек,
ЦIийи йикъан вилив хуьз экв…
Бахт
Вуна хабар кьазва завай,
Гьихьтинди я бахт лугьуз.
ВацIуз килиг вуна яргъай,
Адан нурдиз, авай куз…
Яб це, адан мани хуррам
Секин жедач садрани.
Им бахт тушни — гьисс тавун гъам,
Ватанда хьиз, ядрани…
Сятералди гуьзетиз ваз
КIан жезвачни генани?
РикIе гьахьун чилин аваз,
Таъсибдин тар хвенани?
Ваз кIан жеда, чубарук хьиз,
Цавун тагъдиз экъечIна,
Гьейранариз дуьнья михьиз,
Шад деминик экечIна.
КIел хьиз таза, авай векье,
Къугъваз таза цуькверив.
Чигер кьуна кузвай мекве,
Хъичириз шад вилериз…
Вуна хабар кьазва завай,
Гьихьтинди я бахт лугьуз.
Манидиз яб це на цавай,
Гьикьван шад я ам и къуз.
Адан сесер къвезва япуз,
Седефар хьиз чкIанвай.
Тазвач ада вунни ялгъуз,
Ви дерт ада кьатIанва.
Симфония са затIни туш,
Я са затI туш романсни.
Гимн хьиз я ам, чи руьгьдиз хуш,
Яб це анжах аваздиз…
И легьзейра вуна мегер
Лугьузвачни бахт я им.
ЭкъечIнава цавуз гъетер,
Бахт къарагъай вахт я им!
Вуна хабар кьазва завай,
Гьихьтинди я бахт лугьуз,
Чилиз килиг, икьван ацIай,
Ник юзазва, лепе гуз.
Ксанва рехъ, ксанва дагъ,
Алукьда вахт, къарагъда.
Иви хьана, илифда рагъ,
Гьар са цуьк са чирагъ я!
И легьзейра ви рикIини
Кужумдачни гьевес и!
Гьам серин яз, гьам верцIини,
Гьахьда хуруз нефес и.
И кардиз бахт гьикI лугьудач!
ГьикI хуьда на секинвал!
Ви рикIив хуш тахт вугуда,
Амукьдач са четинвал!
Бахт гьихьтинди я лугьузва на.
За лугьузва: жаваб ваз
Гуз жедач, руш, садлагьана,
Йисар кIанда гьисабна…
Ракьун рехъ
Гьерекатда ава къални секинвал —
Станция, вилик ква мад къекъуьнар.
Уьмуьр даим тушни мегер йигинвал,
Ракьун рехъ хьиз, авай вичин гелкъуьнар.
Гьикьван гена вилик кума мензилар,
Йикъар анжах акъакьнайтIа фин патал.
Гьикьван ама къакъатунар, гуьруьшар,
Вокзаларни ачух я гьа куьн патал.
Санал гена, станциядал вилик квай,
Ахвар хана фяле касди юкьвалай,
Мад туькIуьриз ава состав тади квай
Фин паталди, йиф-югъ талгьуз, ракьалай.
Мад агалай перегонар, къекъуьнар,
Гумадин ни, нурар къацу экверин…
Физва саддиз, хьел хьиз хци, цIуьдгъуьнна,
Са цIар хьана, катиз са-са пенжерни.
Вилик квайди шиле вили гьуьмедин,
Кьисмет я зи, къвазун течиз катзавай.
И гьиссди кьил твазва мадни вине зи,
Ракьун рекьер муьтIуьгъариз, шадзава…
«Лезги газетдин» 2022-йисан 22-нумрадай.
