Ви бубадин къазмада

Кьуру фурсарни дамахар авунал рикI алай са явакьанди, акъваз тийиз, вичин бубадин тарифарда:

— Зи буба ахьтин итим ва гьар са кар алакьдай устIар тир хьи, адан гъилер къизилдинбур тир лугьудай. Адаз жемятдин арада еке гьуьрметни авай ва гзафбуруз ада кIвалерни эцигна. Чаз бубади са къазма эцигна, адан яргъивилиз килигайла, атIа кьил акун мумкин тушир.

И касдиз яб гайи патав гвай муькуьдани вичин бубадин тарифар ийиз башламишна:

— Зи бубадихъ тум лап яргъи, сивни сини кьван фирягь са кьусу авай. Рагъ булутрик­ акатайла, кIвалин къавал хкаж хьана, бубади ракъинин чина гьатнавай булутарни цифер, галатун тийижиз, инихъ-анихъ алуддай.

— Ахьтин кьусуяр жедайди туш, эй ахмакьрин ахмакь! Акьван яргъи кьусу ви бубади гьина эцигдай?

— Гьа ви бубадин къазмада…

«Лезги газетдин» 2021-йисан 13-нумрадай.