Ам виликан Бакудин губерниядин Къуба уезддин ГадацIийихуьре дидедиз хьана. Ада эвелдай медресада кIелна. Шаирдин амай вири уьмуьрни адет хьанвайвал акъатдай жеди, эгер советрин девир алукьначиртIа. ЦIийи девирда ада школада кIел хъувуна, ахпа кьилин образование къачуна, Ленинградда академик Н.Марра тешкилай (гъуьгъуьнлай вичел адан тIварни эцигай) чIалар ахтармишдай институтдин аспирантура акьалтIарна, илимрин кандидатвилин дережа хвена.
Гь.Къадимован муаллимрин арада Кавказдин чIаларин чIехи алимар тир Р.Шаумян ва Л.Жирков авай. Жегьил йисарилай эгечIна, ада хайи чIалал шиирар кхьена, абур газетризни альманахриз акъатна, бязибур урус чIалалди поэзиядин кIватIалрани гьатна.
Гьуьзеймет Къадимова гзаф йисара СССР-дин Илимрин Академиядин Азербайжанда авай филиалда кIвалахна. РагъэкъечIдай патан ва Европадин са шумуд чIал чидай ада лезги чIалайни ахтамишунар тухванай, хайи чIалай, чи литературадай ва фольклордай, милли тарихдай илимдин девлетлу материалар кIватIнай. Абурук, месела, имам Шамилан дявейрин йисара Къуба уезддин агьалийриз Яргунрин наибдин эвер гун, ТIагьиржалдилай тир Агъаширин ал-Жалиди 1871-йисуз туькIуьрай тезкире, гила квахьнавайди яз гьисабзавай «Дербент-намедин» гъили кхьенвай экземпляр ва масабур квай. Гьайиф хьи, академиядин филиалдиз вахкай и документрин кьисмет малум туш.
«Лезги газет»
