Гатфар

 

Къацу хьана, хкаж хьанва ник метиз,

Гарухъ галаз къугъвазава лепе хьиз.

Секин хьанвай вацIарал чан хтанва,

Шир-шир ийиз, рагъул церив ацIанва.

Билбилри хуш шад манийриз ганва худ,

Шараг къугъваз кардик ква, куьнуь, куд1.

ПIинид тарци цуьк ахъайна — памбаг хьиз,

Багъ аквазва чешне ягъай сумаг хьиз.

Дамахзава чили таза векьерив,

Гьар жуьредин гьар ранг алай цуькверив.

Экуьнахъди къарагъзава нуькIвер фад,

Абур шад я, къвезва лугьуз чими гад.

Инай-анай кьуру кьалар жагъуриз,

Алахъзава чпиз мукар туькIуьриз.

ТIебиатдин гьар са пипIе са мани,

Гьар манидихъ вичин аваз, гафарни.

НуькIер шад я, цуьквер шад я, векьер шад,

На лугьуди, тебрикзава сада-сад.

Зи мурад я — инсанарни гьакI хьурай,

Са-сад кIандай а амалар чахъ хьурай.

Автоматар, танкар хьурай музей хьиз,

Полигонар — цуьк акъудай дуьзен хьиз.

Часпаррал аскерар ваъ — мелер хьуй,

Мублагь чиле минаяр ваъ — къуьлер хьуй.

Юкьни юкьвай са вацI фенвай Ватанда,

Дерт шадвилив эвез хьурай зи чанда!

* * *

Вун вутI хьана? — хъша, кIани чубарук,

Мукъаятдиз кьацIук хуьзва за ви муг.

РикI алай нуькI, на муштулух мус гуда?

Чна санал яран цIаяр мус куда?

Элди санал яру тIаратI кьадайвал!

“Лезгинкади” кьуд пата ван твадайвал!

_________________

1  Куд — чIижерин муг.

«Лезги газетдин» 2023-йисан 18-нумрадай.