ЧIал квадармир!

 

Мез аватIа, лезги чIалал рахуха!

Жув чизватIа, чIални чира хайи тир.

Чи бубайри муьтIуьгъ тахьай ягъийриз,

Багъри чилни, хайи чIални хвейи  тир.

 

Лезги чIалал рахух жуван веледрив.

Хайи чIалал лагь манияр, махарни.­

ЧIал са ярж хьиз вине кьуртIа  датIана,

ВикIегь жеда стхаярни, вахарни.

 

ЧIал квадармир, ам са гунагь кар жеда,

ЧIал виждан я, чIал намус я  инсандин.

ЧIал квадарун рикIиз такIан кар  жеда,

Къадир чир хьухь лезги чIалан, Ватандин!

 

Хъсанвални писвал

 

Хъсанвилихъ къимет амач санани,

Гьикьван вафа течир девир хьанва им.

Фул гьатнавай, къайи хьанвай рикIери

ГьиссзаматIа са кIус кьванни яраб чим?

 

Такуй лугьуз хкажзава паруяр,

Къвез акуртIа, кIев хъийизва ракIарни.

ТIимил жезва рикIер ачух инсанар,

И гьал акваз, амач кьарай, ахварни.­

 

Хъсанвили писвилер руг ийида,

Къуй хъсанвал гьар са рикIе аваз хьуй!

Пис легьзеяр терг хьуй михьиз дуьньядай,

Чахъ уьмуьрда хъсан ксар галаз хьуй!

 

Жуван кIвал

 

Виридалайни чими я

РикIизни чандиз.

Мукьва я лап, кIани я

Вири хизандиз.

Хтай чIавуз патахъай,

Ахъаяйла рак,

Хтай хьиз я гъурбатдай

Хайи Ватандиз.

 

Йикъарал тек рагъ жеда,

Йиферални — варз.

Хайи кIвал ваз дагъ жеда,

Далудихъ галай.

Хъел къведач заз хъуьтIуькай,

Зулукай къайи.

Декьикьайра мекьи тир

КIвале я чими.

 

Фейи чIавуз мугьмандиз,

РикI жедач секин,

Ксуз жедач хъсандиз,

Гуьгьуьл яз серин.

Акатайла фикиррик,

Юзада мад тIал.

Виридалай хъсан я

Анжах жуван кIвал.

«Лезги газетдин» 2022-йисан 44-нумрадай