Есир я зун

(Етим  Эминаз  бахшзава)

Есир хьанвай закай къе ви чIаларин,

Самурдал хьиз, секинсуз тир ван алай.

Кьефесдава къе зун ракъин нурарин,

Ишелни хъвер, чимивални мекь авай.

 

Эй, Эмин, зун ви чIаларин есир я,

Муьгьуьббатдин гуьзелвилин цIай галай,

ТIебиатдин цуькверив гвай атир я,

Гуьгьуьл шад яз, пашманвилин къай галай.

 

Есир я зун уьмуьрлух ви чIаларин,

Гьахъни нагьахъ вуч затI ятIа къалазвай­.

Теспачавал вуч я къе зи чIарарин,

Туькезбанан киф хьиз, гарал къугъвазвай?!

 

Ви чIаларин, Эмин, къе зун есир я…

Лезги чIалан мани хьана, чкIанвай.

Вун дуьньядал лап сад лагьай шаир я,

Шииратдиз, рагъ хьиз, чим гваз атанвай.

 

Есир я зун, ви чIаларин тIям акур,

Чуьхуьзва за ви гьар са цIар накъварал.

Гъуцарин  сир вуч тир жал, вун халкь авур?

Дуьнья кIамаз, куьз хутахна цаварал?!

 

Эхиз жезвач зи рикIивай, я эллер!

Гьарайдиз гьай гудай дустар гьинавай?!

Акьалтайла тIурфан чилел, физ селлер,

Фугъарадиз гьай гур Гъуцар гьинавай?!

 

Есир я зун ви чIаларин датIана,

Бахтлу я зун, ви гьар са цIар тикрариз.

Вун себеб яз, зазни илгьам атана,

ЧIал кхьена, рехъ тагана ахвариз…

«Лезги газетдин» 2018-йисан 30-нумрадай