Куз фирай

Вахтар авай, вирида заз

Лугьудай хьи, аял я.

Йисар фена, гила, дуст, вун

Агакьнавай кьегьал я.

 

Гила вав, дуст, гва жегьилвал,

Жуван кьил гва, акьул гва.

Ви вилик къе гьам ишигълу,

Гьамни гегьенш рекьер ква.

 

АкI ая хьи, а рекьера

Сифте камар дуьз фирай.

А рекьера ви жегьил рикI,

Хайи халкьдихъ куз фирай!

 

Фул ава

Гатфар кьиляй пеш акъудна тарари —

Чун я лугьуз тIебиатдин свас, гьелбет!

Зул хьайила, аста-аста гарари

Къугъурзава хура туна пеш хелвет.

 

Гатфар кьиляй къацу жеда яйлахар,

Къванерини махпурдин ранг къачуна.

ХъуьтIуьн цикIиз мад гумукьдач дамахар

А яйлахрив, лацу живед тIушунай.

 

Руш, бес вучиз дамахзава вуна заз? —

Вахъни жуван гатфар ава, зул ава.

Наз гумир мад, гъиле цуьквер кьуна, заз,

Ви вилера мекьи хъуьтIуьн фул ава.

 

Хайи хуьре

Заз кIани я зи хуьр-уба,

Ина чIехи хьана буба.

Рухваярни викIегь, зурба

Асланар хьиз вердишна,

Инсанар хьиз вердишна.

 

Дустар галаз рахаз-хъуьрез,

Гагь хъилериз, гагь дуьз хъжез,

Сада-садал гафар вегьез,

Ина чIехи хьана чун,

Ина рехи хьана чун.

 

РикIиз чими хайи хуьре,

Заз жегьилвал гайи хуьре,

Ашкъиди рикI кайи хуьре

Захъ девлетни вар хьана —

РикIиз кIани яр хьана.

 

Ашкъидикай таж ая

Вун дагъларин марал ятIа, зун я гъуьрчехъан,­

Бес вун закай, кухунна хьиз, гьиниз катзава?

Адет я зи, гъилерал ваъ, тфенг хъуьчIе кьан,

Вилеривди яда за вун, гъилер кватзава.

 

Гатфар чIавуз къакъатдани билбил багъдивай?

Вун патал зи рикI бахча я, цуьквед ник я, руш.

Лукьман лугьур кас катдани са начагъдикай?

Зун начагъ я, вун зи дарман, вун зи рикI я, руш.

 

Ша агата, эхирни вун кьисметдава зи,

Зун гьижранни дидардикай муьгьтеж ая на.

Заз чир хьанва: ви рикIени гьасрет ава зи,

АкI ятIа, фад ашкъидикай са таж ая на.

 

Вучиз ятIа чаради?

Чими нефес чкIанва хупI гатфарин,

ЧIур акъатна къацу хьайи чуьллериз.

Хуш манийрив билбилди шад гафариз,

Гарданар кьаз, туьмерзава цуьквериз.

 

Деминава таран хилел нуькIерни,

Гатфарикай гьевес къачуз кьуьлериз.

Ашкъидава кIанибурун рикIерни,

Вахтуналди сад-садакай хъилериз.

 

Ашкъидин дад, хъилериз, дуьз хъхьун я,

ГьакI акъуднай рикIяй-рикIиз гел чна.

Жейранди хьиз, авчидикай кухунай,

Бес вучиз, руш, закай тамам хъелна на.

 

Накь билбилди гардан кьуна цуькведин,

Къе мехъерин суьгьбет ава арада.

Накь зун патал вун нур гудай Зуьгьре тир,

Къе вун патал вучиз я зун  чаради?!

«Лезги газетдин» 2019-йисан 25-нумрадай