Буба Агьмедов

Сувар халкьдин игитдин

I

Гьар са халкьдихъ хьайиди я игитар,

Асирралди халкьдин рикIе хуьзвай тIвар,

Абур халкьдин эпос хьана женгинин,

Азадвал хуьз къайгъудик квай мулкунин.

Чандилай гъил къачуна, хуьз чил -Ватан,

Чешне хьай чеб, кьегьал хваяр — къагьриман.

Лезги халкьдихъ хьайи игит — адан тIвар

Шарвили тир, туруник хьай гужлу звар!..

II

Забитани Байрама кIватI хъувур ирс,

Халкьд сиверай эпосдин а гужлу гьисс,

Япуз хтай Шарвилидин турун ван,

Гьат хъувурла, гьейран хьанай Лезгистан!..

Шивцел алаз Шарвили Къухмаз кIунтIал,

Килигзава, эцигна гъил турунал,

Гуьзетзава вил, экъуьриз кьуд пата,

Чир ийиз кIанз аватIа хата-бала.

 

Шарвилиди ахтармишиз гьахъ, нагьахъ,

“Кьегьалдин рехъ дуьзди жен, тежен патахъ!”

Лагьана чаз… И рекьиз жен вафалу,

Бубаяр хьиз, уяхни жен, къуватлу!

Эверзава эркек хвайриз, невейриз,

Ватандин пак азадвал хуьр женгиниз.

И кар патал гьайиф текъвен са затIни,

Жуван жасат, авай багьа уьмуьрни.

 

Шарвилидин фикир туш хьи нубатсуз

Къуни-къуншидиз нагьахъ зур къалуз.

“Ислягьвилелд яшамиш хьун абур я.

Баркалла гъир намус, гъейрат сабур я”, —

Лагьай адахъ хьанач чIулав хаинвал,

Къуншидин мулк къакъудиз кIанз къанихвал.

Бахтлубур я къуншияр чеб санал хьун,

Гьуьрметдивди уьмуьр тухуз, къал тахьун.

III

КIелед хивел хьайи залан женгера

Къалурай вич хуьзва халкьди рикIера.

А игитвал хьана гужлу чешме яз,

Таъсир ийир жегьилриз чи чешне яз.

Ихьтин хва чи къагьриман вич лагь, дустар,

РикIел хкиз, тешкил ийиз пак сувар,

Къабил тушни Лезгистандиз гьар йисуз

Шад гьалара КIелед хивел ам тухуз?!

 

Са рахунни алач кардал шак гъидай,

Сувар тухун игитдин тIвар пак хуьдай.

Ам я сувар бубайрин ирс давамдай,

Азадвал хуьр рекье къуват кIватI жедай.

А къуватар йикъандавай жез артух,

Шарвилидин невеяр, куьн чиз рахух.

Лезгистандихъ хьайиди я рухваяр,

Тарихда тур баркалладин зурба тIвар.

 

Зурба калам — Ярагъ Мегьамедан веси:

“ЛукIвал — негь, азадвал хуьх!” лагьай вичи.

Тупламишна Дагъустандин халкь михьиз,

Гана къуват азадвал хуьдай рекьиз.

Мусурманриз тIарикъат — рехъ тухурвал,

Чирна ада шариатда авайвал.

Гьажи Давуд, шумудни сад женгчияр

РикIелла чеб — Шарвилидин невеяр.

 

ВикIегь хваяр хьайиди я гьар чIавуз,

Темягькарриз, хаинариз зур къалуз.

Хайи халкьдиз панагь, куьмек чпикай

Жез, Ватан хвей, уьмуьр адан рекье гай.

ТIвар ягъай свас хуьре амаз, дяведиз

Фейи кьегьал, хквез тахьай кьисметдиз,

Харци яна, пуч хьайибур эллери

Пак яз хуьзва къизгъин, къати рикIери…

«Лезги газетдин» 2019-йисан 25-нумрадай