Ша зи патав
Яр, вуна зи хатур ханва,
Ваз чандавай кьве гаф лугьун,
Яру хъийин, ша зи патав.
Зун ашкъидал алцур хьанва,
ЦIийи кьиляй бине атIун,
Пару хъийин, ша зи патав.
Гьиссерин сел, дагъдин вацI хьиз,
Рагъул хьана, ацIай чIавуз,
Дуру хъийин, ша зи патав.
Хару гатаз, марфад гатаз,
Деврандикай куьцIей чIавуз
Кьуру хъийин, ша зи патав.
Вун тахтунай аватайтIа,
Гьиссерикай галатайтIа,
Агата зав, ша зи патав.
Чаравили, ялгъузвили
Ви мураддин рехъ атIайтIа,
Хару хъийин, ша зи патав…
Вун галачиз
Вун галачиз ажуз жедач,
Усал жедач, ужуз жедач.
Эхда вири четинвилер,
Къван жеда зун, ракь жеда зун,
И дуьньяда вахъ цIигелди,
Эхиратда вун къатканвай
Чил жеда зун, накьв жеда зун…
Хтулдиз кьий
Бадед кIвачик звер кутур,
Бубад сивик хъвер кутур,
Алахъзавай хуьз хатур
Хтулдиз кьий, хтулдиз.
Дидед рикIин чIук я вич,
Бубад кIвалин экв я вич,
Ажеб иер цуьк я вич,
Хтулдиз кьий, хтулдиз.
Бахт къенид, кьил кIевид хьуй,
Фагьумлу са игит хьуй,
Гуьгъуьналлаз ирид хьуй,
Хтулдиз кьий, хтулдиз.
Тофик, вуна це чаз гьай,
Чан гъуцарин верцIи пай.
Халуйрини дамахрай,
Хтулдиз кьий, хтулдиз.
Мурадаз
Вилер вили кьве хат я,
Бадед рикIин мурад я.
Чан гъуцари гайиди,
Вун аваз чун къе шад я.
ВиртIедилай верцIиди,
ТIвар сейлид, вич гъвечIиди.
Чан зи кьарай, зи макьам,
Шехьмир, зи рикI тIар жеди.
Дердин чара, сивин дад,
Вилерин экв, рикIин пад.
Зи уьмуьрдиз хкай гад, —
Вун хвашкалди, я Мурад!
Ашкъидин дугун
Майдин вацран навар ава
Къе зи ашкъид дугуна.
И дугуни цуькун патал
За агъзур тIал чIугуна.
А цуькверин лечекдаллайд
Хвешивилин накъвар я.
Заз акI жезва керчеквал туш,
Им женнетдин ахвар я.
Дугунд юкьвал сим янава
Зи кIанида — зи ярди.
Чилин винел аватIа мад,
Икьван уьтквемд, иерди?..
Вун зи симин пагьливан хьухь,
Зун гьазур я жез кваса,
ИкI, кIаниди, туькIуьрин, ша,
Муьгьуьббатдин са кьиса.
АцIурай зи рикIин тав
Зи азизди, гьикI я вун?
Чан, зи рикIин рикI я вун.
Зун са масан цуьк ятIа,
Цуькведаллай чиг я вун.
Зун бахтлу я дуьньяда,
Ви гьунар я и гьунар.
Зун лекь ятIа гьавада,
Ви лувар я и лувар.
Марфар къвазва гар галаз,
Таран пешер юзазва.
За хару стIалривай
Ви суракьар жузазва.
Гар галукьай тарари
Темен гузва сад-садаз.
Зи вил галай кIанидаз
Лугьудай гаф ава заз.
ЖедатIа, са легьзеда
Ша, лув гана, зи патав.
Ягъин чна мет-метIез,
АцIурай зи рикIин тав.
«Лезги газетдин» 2021-йисан 46-нумрадай.
