Тамарзу я
Ви вилерай заз сагъ дуьнья аквазва,
Ахварайни тек са вавди рахазва.
Тамарзу я ярдин къамат акунихъ,
Эхир авач хажалатрин гъалунихъ.
Нагьахъ вуна ашкъидин цIай туьхуьрна,
Чара касдиз чи мука экв куькIуьрна.
Минет хьуй ваз, мийир закай фитнеяр,
Муьгьуьббатдин ялав амаз къене, яр.
Элкъвенач мад садра яргъаз фейиди,
Мумкин гузвач рикIиз дили ивиди.
Агъана вахъ, алуднай за дапIарар,
Чидачир на ийидайди тапарар.
Гьикьван вахт я, чавай чун, яр, чаразва,
Дердери зун гару тар хьиз гатазва.
МуркIад къаяб гьатнава чи арада,
Батмиш жезва зун гьижрандин харада.
Муьгьуьббат
Заз муьгьуьббат цIун либас хьиз аквазва,
Вафалувал хвей бендедиз чим гудай.
Зи илгьамдин сим манидал рахазва,
Дамаррайни иви физва чил кудай.
Маса гайтIа ви пак намус девранрихъ,
Руьхъ ийида бедендикай кабабна.
Дегиш мийир багъри къамат жейранрихъ,
Жуван гъилел къачумир ваз азаб на.
Ви михьи рикI гьич шейтIандив агудмир,
Атирдин ни галай агъу дадмишиз.
Хазинадкай хиялариз, умудмир,
КIанда лугьуз, алдатмишиз, алхишиз.
Муьгьуьббат я Худади гай аманат,
МуьтIуьгъ тахьай тахтунизни девлетриз.
РикI къачуз жеч, жемир нагьакь гьавалат,
Иес жеда куьн анжах са суьретдин.
КIанивилиз гъалибчияр туш аян,
Ашкъидин цIай акьалтI тийир ялав я.
Куьз герек я руьгьдин гьиссдиз гун баян,
Мукъаят хьухь, куь фикирриз къилав ягъ.
Балаяр
Ишигъ квахьай вилериз зи экв гъайи,
Сад Аллагьди савкьат я куьн заз гайи.
Дидед гъетер, аманат хьуй Худадал,
И чилерал къекъвезва куь гьавадал.
Няметривни гекъиг жедач верцIивал,
Гьар камуна юлдаш хьуй квез экуьвал.
МичIи йифиз чирагъ я зун куь гъиле,
Хар къвайитIа, таж жеда диде кьилел.
Я Рабби, гьич гьелек туш Ваз ялвариз:
“Дуьнья ацIай бахтар хьурай балайриз”.
Веледдин тIал садазни тахьуй кьисмет,
Абурулай жагъидач багьа девлет.
«Лезги газетдин» 2018-йисан 41-нумрадай
________________________________________________________________________
Жульета Омарова 1994-йисан 24-июндиз Кьурагь райондин Моллакент хуьре дидедиз хьана. 2009-йисуз хуьруьн юкьван мектебдин 9-класс акьалтIарна, Дербентдин педучилищедиз гьахьна. Къецепатан чIаларин отделенида кIелна.
2014-йисуз Сулейман-Стальский райондин Испикрин мектебда ингилис чlалан муаллимвиле кlвалахна.
2017-йисуз Моллакент хуьруьн мектебдиз хтана. Алай вахтунда ана секретарвиле ва ингилис чlалан муаллимвиле кlвалахзава.
2016-йисуз ДГПУ-дин къецепатан чlаларин факультетдик экечlна, ингилис ва араб чlаларай чирвилер къачузва.
Ж.Омарова кьве веледдин диде я. Хайи чlалалай гъейри, ада вичин аялриз гиламаз урус ва ингилис чlалар чирзава.
Гьеле мектебда кlелзавай чlавалай хайи чlалал, эдебиятдал рикl алай руша вичин бажарагъ шииратдани къалуриз хьана. Илгьам пайда хьайи береда ада вичин фикирар шииррин цlарариз элкъуьрзава…
Адан шиирар “Лезги газетдиз” , “Дагъустандин дишегьли” журналдиз акъатнава. Интернетда кардик квай “Шиирар” сайтда адан эсерриз кlелдайбуру хъсан къимет гузва.
Ватан
За алцумна гьар са мензил алемдин,
Муг жагъанач гьич зи руьгьдиз архайин.
Къуй дарман хьуй багъри накьвар Ватандин
Чи уьзуьрриз: рикIин дердер ахъайин.
Нур чукIуриз, чим гузава веледри,
На лугьуди, хайи диде гелкъвезва.
Эхь, икрамиз вуна чIугур зегьметриз,
Зун гъурбатдай мад ви патав элкъвезва.
ХупI ярашугъ, ширин ванцел булахрин,
Физ ахвариз бубад чилел, маканда,
Къацу махпур ачух, буллух яйлахрин
И дуьньядин хазинадлай заз кIанда.
Пак дагъларин рехи кьилел экъечIдай
Рагъ дава я къанни цIипуд миллетдин.
Чан эцигна, кар-кIвалахдив эгечIдай
Халкь зурба я, чешне хьанвай гьуьрметдин.
На хуралай чаз багъишай няметрин
Дад рикIелай чи садрани алатдач.
Чун паталди вуна хвейи девлетрин
Даим уьмуьр тариф ийиз галатдач.
КIандай
Зун са пеш яз кIандай зулун береда,
Багъри вилер жагъуриз гьар дереда.
Звер кутадай гару вичин аваздал,
Тек тежервал хъуьтIуьн залум аяздал.
Марф яз кIандай хайи чилел авахьдай,
Бегьер гана, ярдин хъел хьиз алахьдай.
Рагъ экъечIдай, тадиз цифер чукуриз,
Хважамжамдин ирид ранг чаз къалуриз.
Къуш яз кIандай, чархар гудай гьавада,
Манидалди тIебиатдив рахадай.
Кефер патай мад элкъведай макандиз,
Шараг патал гьазур тир чан къурбандиз.
Сад Аллагьди халкьнава зун инсан яз,
И дуьньядин регьимлу тир мугьман яз.
Къуй махлукь хьуй инсанвилин шартIар квай,
Дуьз амалрин зурба тир са ктаб гвай.
Марф
Ахвара зун архайин тир береда
Гугрумдин ван гьатна секин дереда.
ЦIайлапанди вичин гужлу гъилерив
Мумкин гузвач цава авам циферив.
Гимишди хьиз рапI-рапI гузвай стIалар,
Шагьидар яз чизвай рикIин хиялар,
Яваш-яваш зи пенжердив агатиз,
Алахъзава кузвай рикIик акатиз.
Халикьди марф заз савкьат яз багъишна,
Туьхуьрна цIай, абукевсер илична.
Ви гьамгадкай даим хьана заз дарман,
Хайи чилиз бегьер гана авадан.
Марфадихъ авай зурба я къуватар,
Гьуьжетдай вахъ галаз авач такьатар.
Берекат гуз кесибриз, я марф дава,
Нагьахъбуруз яракь я къваздай хура.
Дишегьлийриз
Дишегьлийриз анжах цуьквер багъиша,
Гуьрчег чинал хъвер жедайвал гьамиша.
На лугьуди хуррам ванцел билбилдин
Шадардайвал даим уьмуьр гуьгьуьлни.
Дишегьлийриз лагь куьне ширин гафар,
Жегьил чанда хъуьтIуьзни хьурай гатфар.
Шуьшед къаб хьиз, назик рикI хаз кIан жемир,
Дердер юкьва садрани ялгъуз тамир.
Нагьахъ мийир дишегьлийриз туьгьметар —
Герек туш чаз девранарни девлетар.
КIанзавайди тек муьгьуьббат ва бахт я,
Дидевилин гьуьрметдин тIвар — са тахт я.
«Лезги газетдин» 2019-йисан 10-нумрадай
__________________________________________________________________________
Диде — зи экв
ЦIверекI хьиз зун живедин
Элкъвез авай цавара.
Хъуьтуьл метIел дидедин
Архайин тир ахвара.
Каспий гьуьл кьван рехи кьил
Хурудив зи агудна,
Михьзавай кьве кьежей вил,
РикIяй гьижран акъудна.
Тамун юкьвай дердерин
На чаз жигъир авуна.
Ширин ванци бендерин
Чун суьгьуьрдиз чIугуна.
Дидедин дад гекъигиз
Жеч няметрив женнетдин.
Ви багьа тIвар эцигиз
Чилел гуж я веледдиз.
Чими лувак мелекдин
Куьрпеярни зирек я.
Вун — аманат Фелекдин,
Руьгьдин къуват, зи экв я.
* * *
Багъри макан, валди я зун гьавалу,
Ашкара я, халкь ава вахъ камаллу,
Гел тунавай асирралди тарихда,
Чна, невейри, даим уьмуьр тарифдай.
Пара хьана душманар чун чапхундай,
Анжах, сир туш, гьич са четин вахтунда
Кьил агъузнач баркаллу тир рухвайри,
Чаз гележег экуь авур архайри.
Ярагъ Мегьамед, ви веси пак пайдах я,
Михьи тIварни гьамишалугъ дамах я.
Кьегьал лекьер тIимил туш ирс давамдай,
Душманри чун кьун тавурай авамрай.
Гъетер къе…
Гъетер къе заз хъуьрена,
Патав зи бахт къвезва лугьуз.
КIвале чирагъ куькIвена,
Илгьамди акъудна цавуз.
КIанидалай шад хабар гваз,
Лацу лифер хквезава.
Азиз ярдиз мад ийиз наз,
Къужахда зун элкъвезава.
Экуьн ярар ахварамаз,
Къаршидиз на ая тади.
Цавун аршда, гъил-гъилеваз,
Аквада ваз рикIин гуьзгуь.
Хурудив за кьил агудна,
Желбда ви дердер жувалди.
КIандатIа ваз, рикI акъудна,
Къурбанд ийин вун паталди.
Балаяр
Куь куьлегри бахтунин
Квез авурай кьуд пад ачух.
Хьуй сагьибар тахтунин
Югъ-къандавай жезвай артух.
Зун ялвариз галатдач
Куьн багъишай Худадиз.
Циф рикIелай алатдач,
Дерт хьайила баладиз.
Зи дуьайрин булахдай
Квез къурбандда за гьар са стIал —
Къуй дидедин къужахда
Пак руьгьерин секин хьуй тIал.
И хуралай гайи нек
За квез гьалал ийизва.
Куь рекьера зурба экв,
Зун куькIуьриз, къекъвезва.
«Лезги газетдин» 2019-йисан 18-нумрадай
__________________________________________________________
Гужлу ахвар
Зи фикирри хранавай епинал
Са йифиз зун асмишзавай ахвара.
Лацу шивци лувараллаз эркинан
Тухузавай зун сейрдиз цаварай.
Тамашайла цавун аршдай чилериз,
Къурху хьана, акъатна хар бедендиз.
Аламатар акур язух вилериз
Аян тахьуй гьич мусурман бендедиз.
Шагь дагъларай авахьна ивид селлер:
“Эх жезамач нефс, пехилвал инсанрин.
Чи архайри, чан гана, хвейи чилер
Девлетрихъ къе маса гузва душманриз”
Гьуьл рахана, лепеяр хьанвай рехи:
“Куьз ийизва лавгъавилер жегьилри?
Гьуьрметзамач, чизамач гъвечIи-чIехи,
Кьабул тийиз тербия чи несилри”.
Цав ишехьна, къув язавай гарари.
АкI жедай хьи, мукьвал я дуьньяд эхир.
Гьайванрини, къушарини, тарари:
“Я Сад Аллагь, вуч я бес чак квай тахсир?”
Шукур Аллагь, акьалтI хьана залум йиф,
Ракъин нурар — зи дердиниз хупI дарман!
Пенжердай вил вегьейла, са лацу лиф
Хъуьрена заз — ислягьвилин я лишан!
«Лезги газетдин» 2019-йисан 46-нумрадай
___________________________________________________________________________________________
