И кIвал

Бегьер гузвай сал акунвай,

Гьунарлу хьайи лежбердиз хьиз,

И мегьрибан кIвал акурла,

Хвеши хьана къе зи рикIиз.

 

Жумарт суфра юкьвал ала,

Къерехрални — хъуьцуьганар,

На лугьуди ина ава

Инсанвилин ишигъдин зар.

 

Лацу цлал — багьа чуьнгуьр,

Сталинан гуьрчег суьрет,

Гьейран жеда шегьерни хуьр,

Акурла и кIвалин сифет.

 

Чи Сулейман адалатдин

Туьхуьн тийир чешме я хьи!

Гьич шак алач, адан кIвални

Сересвилин чешне я хьи!

 

Аквазва заз агьалийрин

Хвешилавай чинар иер.

Иниз гъанва балайрини

Марварарни мулдин цуьквер…

«Лезги газетдин» 2018-йисан 33-нумрадай