Хуьр экъечIай дере

ЧIулав дагьар, кьакьан кукIвал дагъдин кьун

Гуьмбет яни скульпторди эцигай,

Хуьзвайди хьиз сергьят чилин ва цавун,

Мани кьуна вичиз вацIун ванцикай?

 

Вилер ада жидаяр хьиз сухнава

Дагъларикай къекъечIзавай кIамара.

Гьавади ам векь тIуьрди хьиз тухнава,

ЦIранва рагъ адан тIарам дамарра.

 

Баябан я дере, амач ина хуьр.

Дар жигъирар туна, гегьенш арандал

Абур гъайи инсан, кутур багъни хир,

Дагъ акваз кIанз экъечIзава айвандал.

 

Саврух синерални кукIушрал,

Ценеривай гатфар хушдиз рахазва.

Цуькверикай алукIнавай булушка

Рушан вилер хьиз булахар ргазва.

 

Такабур яз килигзавай яйлахриз,

На лугьуди, рикIел хкиз куьмекна

Вафалу тир чи дагълариз, къишлахриз

Хквез рекьел алайдакай терекма.

 

Хуьр куьч хьана — генгвал кIанда инсандиз!

Хвена рикIе виш йисарин авазар.

Къе дагъвиди мублагь чилел арандин

Ачухзава берекатдин дарвазар.

1977-й.

 

Зи Ватанди чIугвазва…

Гатфарин вахт, гьар са ери, гьар ватан

Цуькверивди безетмиш яз аквазва.

Девлетар хуьз арандавай гьар чубан

Вичин хайи чили вичел чIугвазва.

 

Ватандивай къакъатна зун чубан яз,

Ватанди къе чIугвазва мад вичел зун.

Хайи хуьруьн яйлахар заз масан я,

Хайи хуьруьн экъечIнава рекьел зун.

 

Зун инамаз, фикир хуьре къекъвезва

Таза шагьвар алай дагъдин синерал.

Мугъандин чуьл гьеле завди рахазва,

Лугьузва заз: “Мукъаят хьухь кIелерал”…

1966-й.

«Лезги газетдин» 2018-йисан 29-нумрадай