Чи ватанэгьлияр — гьар сана
ЧIехи рикI авай, мергьяматлу ксар, халисан ватанпересар, чешнелу пешекарар дагъдин гъвечIи хуьрерайни акъатзавайди я. Алай вахтунда Краснодарда яшамиш жезвай Докъузпара райондин Текийрин хуьряй тир Максим Ражидинович Садикьов гьахьтинбурукай я. Ам 1988-йисан 22-июндиз Шалбуз дагъдин этегрив экIя хьанвай гъвечIи хуьре дидедиз хьана. Максим са йиса авайла, адан диде-буба Краснодардин крайдин Динской райондин Нововеличковский станицадиз куьч хьана.
Мектеб хъсан къиметралди акьалтIарай ам 2005-йисуз КубГТУ-дин автомобилринни рекьерин факультетдик экечIна. 2010-йисуз армиядиз эвер гайила, Дагомыс шегьерда ВВС-дин кьушунра вичин буржи лайихлудаказ кьилиз акъудна. Гуьгъуьнлай ам 2011-йисалай “Крафтер” тешкилатда логистикадин къуллугъдин регьбер хьана. 2014-йисалай М.Садикьова улакьрин тешкилатдин — “Тэкар Групп” ООО-дин — коммерческий директорвиле кIвалахзава.
Краснодарда яшамиш жезвай ватанэгьлийрин арада ам лезги диаспоради кьиле тухузвай мярекатрин вилик-кьилик квайбурукай сад яз машгьур я. Чаз малум тирвал, Краснодардин крайда авай ватанэгьлийри, санал кIватI хьана, тешкиллувилелди спортдин, медениятдин ва маса мярекатар кьиле тухузва. Кьилди къачуртIа, ана яшамиш жезвай лезгияр хайи чIалал кхьизвай умуми диктантдин мярекатдик экечIзава, рамазандин вацра ифтарар тешкилзава ва икI мад. Спортдин жигьетдай кьетIендаказ къейд ийиз кIанзава хьи, 2019-йисуз Краснодарда авай лезгийри “Леки” тIвар алай футболдин команда арадал гъана. Командадик квай футболистар асул гьисабдай Кьиблепатан Дагъустандай тир чи ватанэгьлияр я.
Заз чизвайвал, Максим Садикьова эхиримжи йисара мергьяматлувилин “ЛЕКИ” фондунин кIвалахрик къуьн кутазва. И жигьетдай вичи икI лагьана: “2018-йисан эхирра зун Краснодарда “ЛЕКИ” фондунин векилрикай сад тир Руслан Мегьдихановахъ галаз таниш хьана. Фондунин макьсадар, ада кьиле тухузвай кIвалахар чир хьайила, зун гьейран хьана ва, жуван мумкинвилериз килигна, алакьдай куьмекар гун патал къуьн кутун кьетIна”.
Къейд ийиз кIанзава, 2022-йисан мартдиз “Лезги газетдин” редакциядини “ЛЕКИ” фондуни санал Эминхуьре кьиле тухвай лезги чIалан гегьенш олимпиадада жуьреба-жуьре шегьеррай хтай ватанэгьлийри, гьа жергедай яз М.Садикьовани иштиракна.
Максим Садикьов акьалтзавай несилриз чешне къалуриз жедай ватанперес я. Кьисметди Краснодардиз акъуднаватIани, ада датIана хайи ватандихъ галаз алакъа хуьзва, гьар йисуз 5-6 сеферда Дагъустандиз хквезва.
“Жегьилри сифтени-сифте жуван милливал, лезгивал хуьн герек я. Хайи чиливай яргъариз акъатнавай лезгийри ватан рикIелай алуд тавун, жуван кIвал-югъ гадар тавун герек я. Чи адетар, хайи чIал хуьн гьар сада вичин эвелимжи везифа яз гьисабна кIанда”, — лугьузва ватанэгьлиди.
Пуд хциз тербия гузвай Максим Садикьоваз, адан хизандиз чандин сагъвал ва кIвалахда мадни еке агалкьунар хьурай!
Куругъли Ферзалиев
