Дагъустанда “Демография” милли проектдин ва республикадин инвестицийрин программадин сергьятра аваз, чпин яшар 2 вацралай алатнавай аялар патал цIийи ясли-бахчаяр эцигда. Идакай “Лезги газетдиз” РД-дин образованидин ва илимдин министертсводин пресс-къуллугъди хабар гана.
ЦIийи объектар пуд йисан къене эцигун фикирдиз къачунва. Нетижада 2021-йисуз Дагъустанда алава 59 ясли-бахча пайда жеда ва анра 9 агъзурдав агакьна аялар тербияламишда.
Санлай къачурла, и макьсадриз акъатзавай такьатри 8,2 млрд манат тешкилзава. Абур федеральный ва республикадин бюджетрай чара ийида.
Министерстводин делилралди, алай вахтунда ясли-бахчайриз фин патал 2 вацралай пуд йисал къведалди яшара авай 2000, пуд йисалай ирид йисал къведалди яшара авай 13 агъзур аял нубатда акъвазнава.
Ясли-бахчайра бес кьадар чкаяр тахьунин себеб республикада гзаф аялар хунихъ галаз алакъалу я. Дагъустандин мектебра кIелзавай аялрин кьадар 2017-йисалай 13 агъзурдан гзаф хьанва. Идалай гъейри, республикадиз патарилай хквезвай ватанэгьлийрин кьадарни тIимил туш.
И месэла гьялун патал РД-дин образованидин ва илимдин министерстводи алава серенжемарни кьабулзава. ЦIийи ясли-бахчаяр эцигунилай гъейри, виликдай чпе аялрин бахчаяр аваз хьайи, амма алай вахтунда маса рекьера ишлемишзавай идараяр бахчайриз элкъуьр хъийида.
«Лезги газет»
