Мукьвара Дербентда яшамиш жезвай саки 100 хизандиз шегьердин администрацияди чилин участокар чара ийида. Абур чилер къачун патал фадлай нубатда акъвазнавайбурув агакьда, — хабар гузва шегьердин администрациядин пресс-къуллугъди.
Чилин участокар мукьвара элкъвена муниципалитетдин хсусиятдиз хканвай мулкарилай гудайвал я. Чилер пайдалди вилик ина улакьар фидай рекьер, тротуарар ва ясли-бахча жедай чкаяр тайинарда.
Администрациядин пресс-къуллугъдин векилди алава хъувурвал, Советрин Союз чкIайдалай кьулухъ Дербентдин фадлай нубатда акъвазнавай агьалийриз сифте яз чилер гуда. Алай вахтунда абурун кьадар 1500-лай алатнава.
Къанундал асаслу яз, чилер къачудай ихтияр Ватандин ЧIехи дяведин иштиракчийриз, Чернобылдин АЭС-дал арадал атай авариядин нетижаяр арадай акъудайбуруз, етимриз, диде-бубадин къаюмвиликай хкатнавайбуруз, пуд ва адалай гзаф аялар авай хизанриз ава.
Дербентда бес кьадар чил авачтIани, яшайишдин объектар эцигдай мулкарни лап четиндиз жагъурзаватIани, шегьердин администрацияди чилин игьтияж авай ва фадлай нубатда акъвазнавай шегьерэгьлийриз чилин участокар чара ийидай къарар кьабулна.
2015-йисалди чилин игьтияж авайбур регистрация авунвай сиягьар къайдадик квачиз туькIуьрнавай. Гьавиляй къе администрацияда ихьтин са шумуд сиягь ава. Пулсуздаказ чилер къачудай ихтияр авайбур тайинарун патал шегьердин администрацияди талукь органриз махсус чарар рекье тунва.
Чи мухбир
