“Лезги газетдиз” Дагъустандин Кьилин ва Гьукуматдин Администрациядин пресс-къуллугъди хабар гайивал, 9-июлдиз Владимир Иванован регьбервилик кваз илимдин, техникадин, литературадин, публицистикадин, искусстводин ва архитектурадин хилерай государстводин премияр гунай РД-дин Кьилин патав гвай комиссиядин заседание кьиле фена.
Мярекатдин сергьятра аваз, комиссиядик квайбуру винидихъ тIвар кьунвай хилерай ва Расул Гьамзатован тIварунихъ галай премияр къачун патал теклифнавай кIвалахар веревирдна.
Къейд ийин хьи, Дагъустандин госпремияр кьве йисалай садра гузва. Санлай къачурла, абурун кьадар цIудав агакьзава.
Р.Гьамзатован тIварунихъ галай премиядикай рахайтIа, ам Дагъустандин халкьдин шаирдин къамат эбеди авунин мураддалди арадал гъанва. И премия анжах шииратдин эсерар кхьизвайбурувай къачуз жезва. Абуру кьадар кьвед я, чебни кьве йисалай садра гузва.
Малум хьайивал, алай йисуз РД-дин госпремияр къачун патал комиссиядив 27 кIвалах агакьнава. Р.Гьамзатован тIварунихъ галай премиядиз 3 кIвалах теклифнава.
Заседанидин сергьятра аваз и кIвалахар комиссиядиз теклифнавай карханайрин векиларни рахана.
Адет тирвал, комиссиядин членар са гьафтедин къене и кIвалахрихъ галаз таниш жеда ва гуьгъуьнал алай гьафтеда сесер гун патал мад сеферда санал кIватI хъжеда.
«Лезги газет»
