Къурушви Мурад Жабирович Къулиева Москвадин областдин Серпухов шегьердин военный академия агалкьунралди куьтягьна. Малум хьайивал, жегьилдиз, имтигьанрин госкомиссиядин къарардалди, инженер-физиквилин рекьяй пешекарвилин дережа ганва.
Мурад 1993-йисан 24-февралдиз Каспийск шегьерда дидедиз хьана. Къулиеврин сихилда офицерар тIимил авач. Алай вахтунда Владикавказда авай умуми кьушунрин 58-армияда къуллугъзавай подполковник Мегьамед Къулиев Мурадан ими я. Имидин рухваярни чпин уьмуьр военный къуллугъдихъ галаз алакъалу авунвайбур хьуниз килигна, Мурадани гьабурулай чешне къачун кьетIна. ИкI, гъвечIи чIавалай офицер хьунин къаст рикIе гьатай викIегь жегьилди гележегдин пеше хкягъунин карда маса фикир хъувунач.
Къейдна кIанда хьи, Мурадан стха Маратани алай вахтунда Ленинградский областдин Луга шегьерда икьрардин бинедаллаз аскервиле къуллугъзава.
2008-йисуз Каспийскдин 2-нумрадин мектеб куьтягьайдалай кьулухъ Мурад Жабирович Владикавказда авай Суворован тIварунихъ галай Кеферпатан военный училищедик экечIна ва 2011-йисуз анаг куьтягьна. Училищеда кIелдай береда спортдин рекьени хейлин агалкьунар къазанмишна. Абурулайни гъейри, училищеда адакай отделенидин командир хьана.
Училище куьтягьайдалай кьулухъ Москвадин сергьятар хуьнин институтдик экечIдай фикирдал атанатIани, жегьилдиз ана кIелдай кьисмет хьанач. 2014-йисуз Москвадин областдин Серпухов шегьерда авай стратегиядин метлеб авай ракетайрин кьушунрин военный академиядик экечIна, алай йисуз анаг куьтягьна. Военный академиядин ядерный яракьрин факультетда кIелай вад йисуз, сержантдин чин аваз, Мурада взводдин командирдин заместителдин везифаяр тамамарна.
Серпуховда авай РФ-дин оборонадин министерстводин академия акьалтIарунин гьакъиндай диплом 21-июндиз ватанэгьлидив генерал-майор Виталий Павличенкоди шад гьалара вахкана.
Мурад Къулиева 2018-йисан 9-майдиз Москвадин Яру Майдандал кьиле фейи Гъалибвилин гурлу парадда иштиракна. Халисан лезги тербия къачунвай жегьилди вич вири чкайра чешнелудаказ, викIегьдаказ, эдеблудаказ тухузва. Ихьтин ерияр хас тирвиляй ада къваларив гвайбурун патай гьуьрметни нуфуз къазанмишзава.
Академия куьтягьайбур военный рекьяй къуллугъ кьилиз акъудун патал жуьреба-жуьре шегьерриз рекье твазва. Лейтенантдин чин авай Мурад Къулиеваз Белгород шегьердиз фин теклифнава.
Гьа икI, къурушви Къулиеврин сихилда са офицер мадни артух хьанва. Къуй жегьилдикай гележегда Россиядин аскервилин вини дережадин тIварарин сагьиб, гьар са карда еке агалкьунар хьурай!
Куругъли Ферзалиев
