Дербент шегьердин агьалияр суткадин кьиляй-кьилиз хъвадай ва майишатда ишлемишдай целди, жуьреба-жуьре себебар аваз, таъминариз тежез гзаф йисар тирдакай “Лезги газетдини” са шумудра кхьейди я. Шегьердин вилик-кьилик квайбуру и хци месэла гьялун патал мумкинвилер жагъурзава, цIийи планар веревирдзава. РикIел хкин. Дербент шегьердиз яд гъун патал Самурдин цин турба (водовод) эцигунин кIвалахар гьеле 80-йисарин эхирра башламишнай. Гьа чIавуз Самур-Дербент водоводдин проект РСФСР-дин Госстройдин экспертизадайни акъатайди я. Адан бинедаллаз, 2013-йисан сифте кьилералди Дербентдин агьалияр патал и лап важиблу объектдал кIвалахар саки 80 процентдин тамамарни авунай, гьа и йисан эхирдалди водовод тамамвилелди ишлемишиз вахчун лазим тир.
Амма, гзафбурун рикIелни алама жеди, а чIавуз Мегьарамдхуьруьн райондин Самур хуьруьн агьалийрин патай еке наразивал арадал атанай. Себеб — эгер проектда къалурнавай чилерай яд къачуз хьайитIа, Самурдин тамуз зарар жеда. Са гафуналди, гзаф хар-жар авур водовод гьа чIавалай инихъ ишлемишун патал вахкун тавуна амукьна. Куьгьне хьанвай ам эхирдалди давамар хъувунин лазимвални авач. Пешекарриз гьа икI хъсан яз акунва.
Месэладихъ маса татугайвални, хийирсузвални ава: виликан проектдал асаслу яз, Самурдин яд гьамбарханайрай (водозаборы) 17 электронасосрин куьмекдалди къачуна кIанзавай. Электроэнергия ишлемишунин харжияр ва бязи маса шартIар гьисаба кьурла, Самурдин яд гзаф багьади жезвай — адан гьар са кубометр шегьердин агьалийриз 16 манатни 80 кепекдай акъваззавай.
Гьа икI, винидихъ къалурнавай себебриз килигна, Дербентдиз хъвадай алава яд гъун патал цIийи чка жагъурунин месэла арадал атанва. Ам гьялунин мумкинвилер гьихьтинбур ятIа чирунин мураддалди и мукьвара Дербентдин администрациядин кьил Хизри Абакаров шегьердин ЖКХ-дин са десте пешекарарни галаз чкадал — и сеферда Азадогъли (Мегьарамдхуьруьн район) хуьруьз фена.
Себебни ахьтинди я хьи, и хуьре авай къарасудай гьеле фадлай инихъ Дербентдиз кьве водоводда аваз (сад — шегьердинди, муькуьди — ракьун рекьинди) хъвадай яд агакьарзавайди я. А целди алай вахтундани шегьердин бязи районар таъминарзава.
Чкадин СМИ-рин векилриз Хизри Абакарова малумарайвал, куьгьне, къуватдай аватнавай проект гъилелай хъувунин лазимвал арадал атанва. Шегьердин кьилин фикирдалди, Дербентдиз алава яд гъидай чешме Азадогъли хуьре авай булахар хьун мумкин я. И рекьин артуханвал ам я хьи, тIвар кьунвай булахрай яд турбайра аваз алай вахтунда Дербент райондин Нуьгди хуьре авай насосдин станциядал кьван электроэнергиядин куьмек галачиз агакьда ва яд гъунин барадай жуваз акъваздай къиметни хейлин тIимил жеда.
Эгер фикирнавай цIийи планар кьилиз акъатдайбур хьайитIа, Дербентдиз хъвадай алава яд Азадогълидай гъунихъ генани гзаф важиблу, хийирлу артуханвал ава — Самур вацIа цин баланс чIур, тIимил жедач, неинки са лезги чилин, гьакIни вири Дагъустандин къимет авачир хазина, девлет тир Самурдин там патални хаталувал арадал къведач.
Нариман Къарибов
