Хуьруьн майишатдин карханаяр, лежбервилинни фермервилин майишатар, арендаторар патал чуьлдин кIвалахрин къизгъин вахт алукьнава. Уьзуьмлухрани багълара, салара ва маса хилера агротехникадин серенжемар кьиле тухунихъ галаз санал, абурун вилик общественный мал-къарадиз алафдин мягькем бине яратмишунин везифани акъвазнава.
— Алай йисуз районда санлай 27000 тонн векьер ва 4000 тонн самар гьазурун планламишнава, — лугьузва Сулейман-Стальский райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова. — Районда векьер ягъунин, абур кIватI хъувунин, мал-къаради кьуьд акъудзавай чкайрал хутахна таяйра тунин кIвалахар хъсан тешкиллувал аваз кьиле физва, кIвалахдин еришарни йигинбур я.
Районда векьер ягъунив сифте дуьзендин зонада авай ДаркIуш-Къазмайрин, Чуьхверхуьруьн, ЦIийи Макьарин, Эминхуьруьн ва Герейханован хуьрерин мулкарал алай хуьруьн майишатдин карханаяр, КФХ-яр ва агьалияр эгечIнава. Абуру векьер люцерна цанвай уьруьшрай, багъларай, къурухрай язава.
Векьин гегьенш майданар “Горец” ООО-дихъ ава. Ана люцерна цанвай 33 гектардин майданрай ва багъларай векьер яна.
— ЦIинин йисуз уьруьшра, багълара, къурухра къалин векь ава, гьавиляй инанмишвилелди лугьуз жеда хьи, векьер планламишнавай кьадардилай артух кIватI хъийида, мал-къарадиз тух кьуьд тешкилда, — лугьузва Гьамидин Абдулкъафарова.
Гьамидин Абдулкъафаровахъ галаз чун алафар гьазурзавай са шумуд участокдиз фена. КIвалахар кьиле физвай гьалдилай ам рази яз амукьна.
Райондин хуьруьн майишатдин карханайра, лежбервилинни фермервилин майишатра ва агьалийрин участокра векьер ягъунин, кIватI хъувунин ва туькера кьунин кIвалахар давам жезва. Векьер ягъунив дагълух ва гуьнепатан хуьрерин майишатар, агьалиярни эгечIзава.
Хазран Кьасумов
