Алай йисан эхирдалди Каспий гьуьлуьн цин дережа 15 сантиметрдин агъуз хьун мумкин я, хабар гузва, “РусГидро” ПАО-дин делилрал асаслу яз, информациядин агентствойри.
Пешекарри гьисабзавайвал, яд тIимил хьуни фауна дегиш ва кьиблепатан регионра гьалар четин хьунал гъун мумкин я. Гидрометцентрадин векилрин ва Каспийдин гьуьлуьн илимдинни ахтармишунрин центрадин пешекаррин гафаралди, икьван агъуз дережадиз гьуьлуьн яд лап кьит тир дуьшуьшра аватзава.
Алимри гьисабзавайвал, яд тIимил хьун гатфар чимиди хьунихъ ва Каспий гьуьлуьз авахьзавай Волга ва маса вацIара бес кьадарда яд тахьунихъ галаз алакъалу я.
Майдин эвелра Волжский ГЭС-дал тади гьалда ва еке кьадарра яд гадариз башламишна, амма и серенжемдини Каспий гьуьле арадал атанвай гьалдиз таъсирдач.
Пешекарри хабар гузвайвал, ихьтин гьалар 20-асирдани арадал атайди тир. А чIавузни гьуьлуьн флора ва фауна дегиш хьанай, амма, са кьадар вахт алатайла, цин дережа чкадал хтанай.
«Лезги газет»
