Россияда демографиядин гьалар хъсанарун патал вилик эцигнавай месэлаяр кьилиз акъудуниз талукь совещанидал премьер Дмитрий Медведева чи уьлкведин дарда авай хизанриз куьмекдай проект гьазурзавайдакай лагьана. Идакай “Новости” РИА-ди хабар гузва.
ЦIийи закондал асаслу яз, аялриз гузвай пулар (сад ва кьвед лагьай аялриз) гьар са касдал гьалтзавай дуллух яшамиш хьун патал чарасуз герек кьадар такьатар кьведаз зарб авурла, акъатзавай кьадардилай тIимил тир хизанриз гуда. Алай вахтунда а дуллух яшамиш хьун патал чарасуз герек такьатрал абурун зур пай эхцигайла акъатзавай кьадардин дережада ава.
Премьерди гьакIни гьар вацра са аял патал гудай пулунин кьадарди 10 агъзурдалай виниз тешкилдайди малумарна.
Къейд авун лазим я хьи, Владимир Путина 1-январдилай 45 агъзур манатдилай тIимил дуллух авай хизанрай тир аялриз пулар гудайди (10-11 агъзур манатдин кьадарда аваз) раижнай.
Зегьметдиз къабил, амма инвалид аялдихъ гелкъуьн лазим тирвиляй кIвалахдик квачир диде-бубайрин гьакъиндай лагьайтIа, ахьтинбуруз гудай пулунин кьадар алай йисан 1-июлдилай кьве сеферда артух жеда.
РикIел хкин: “Демография” милли проект В.Путина “майдин указда” малумарнавай 12-дакай сад я. Ам федеральный 5 проектдикай — “ЧIехи несил”, “Общественный сагъламвал мягькемарун”, “Аялар хайила, хизанриз финансралди куьмекун”, “Дишегьлияр кIвалахдик хьунин карда куьмекун — 3 йисал къведалди яшда авай аялар патал школадиз фидалди чирвилер гудай шартIар яратмишун” ва “Спорт — уьмуьрдин норма” — ибарат я. И проектар уьмуьрдиз кечирмишун патал 2024-йисалди уьлкведин бюджетдай 3 триллион манат чара ийида.
«Лезги газет»
