24-июндиз Дагъустан Республикадин Кьилин ва Гьукуматдин Администра­ция­дин Руководитель Владимир Иванова “Россиядин Федерацияда жегьилрин наркотикриз акси политика” мярекатдин пленарный заседанида иштиракна. Ам республикадин Къумтуркъала районда Вирироссиядин наркотикриз акси “Кьил-кьилел алай Россия” форумдин сергьятра аваз тухвана. 

Виче уьлкведин 63 региондай тир 120-далай виниз  инсанри иштирак авур Ви­рирос­сиядин чIехи и форумди вичин кIва­лах 23-июндилай 26-июндалди тухвана.

Заседанидин модераторвиле “Кьил кьилел алай Россия” Федеральный проектдин руководитель, РФ-дин Общественный палатадин член Султан Хамзаев экъечIна. Мярекатда жегьилрин кра­рин рекьяй Федеральный агентстводин регьбер Александр Бугаева, РФ-дин здра­воохраненидин министрдин заместитель Олег Салагая, Дагъустандин талукь тир министерствойрин, ведомствойрин, къуватдихъ галаз алакъалу къурулушрин руководителри иштиракна.

Республикадин Кьилин тIваруни­хъай гьуьрметлу мугьманар, форумдин иштиракчияр ва экспертар тебрик авуналди, РД-дин Кьилин ва Гьукуматдин Администрациядин Руководителди исполнительный властдин вири органри  ва къуватдихъ галаз алакъалу къурулушри и рекьяй са­нал кIвалахунин важиблувал къейдна.

“И форумдин сергьятра аваз чаз квехъ галаз санал Дагъустан ва Россия акьалтIай хаталу завал тир наркотикрикай азад авунин рекьер-хуьлер жагъуриз кIанзава”, — алава хъувуна Владимир Иванова.

РФ-дин здравоохраненидин министрдин заместителдин фикирдалди форум наркотикриз акси кIвалахдин пайгар комплексный прог­раммаяр туькIуьр­дай майдандиз эл­къуь­риз жеда. ГьикI лагьайтIа, алай вахтунда жуьреба-жуьре регионра наркотикрин вилик пад кьуниз талукь кIвалах гьар жуьреда тешкилнава.

Султан Хамзаева малумарайвал, “Кьил-кьилел алай Россия” проектдин пешекарри наркотикриз акси кIвалах тухунин барадай Россиядин регионрин рейтинг гьазурнава. Ам, са жерге рекьерай статистикадин рекъемар веревирд авуналди, уьлкведин вад ведомстводин делилрин бинедаллаз туькIуьр­навайди я. Султан Хамзаева хабардар авурвал, наркотикрикай иллаки гзаф дережада азад тир пуд региондин жергедик Ненецкий автономный округ (НАО), Архангельский область ва Чечен Республика акатнава. И барадай амайбурулай татугай гьалда Московский ва Челябинский областар, гьакIни Хакасия Республика ава. “Регионрин рейтингдиз талукь тамам­ сиягь форум куьтягь хьайидалай гуь­гъуь­низ раижда”, —  къейдна Султан Хамзаева.

Гуьгъуьнлай пленарный заседанидин иштиракчийрихъ мугьманриз чпи итиж ийизвай вири суалар гудай мумкинвал хьана. Абурув тамам жавабарни агакьна­. Кьилди къачуртIа, жегьилри ин­тер­нетдин сетда сагълам  къайда пропаганда авунин кIвалахдиз, и къайда машгьур авунин мураддалди министерствойрихъ ва спортдин федерацийрихъ галаз санал кIвалахуниз итиж авуна.

Мярекатда РД-дин вице-премьер — образованидин ва илимдин министр Уммупазил Омаровади, РД-дин Гьукуматдин Председателдин заместитель Рамазан Жафарова, къуватрихъ галаз алакъалу къурулушрин ру­ководителри иштиракна.

Мярекат жегьилрин крарин рекьяй Федеральный агентстводи, Дагъустан Республикадин жегьилрин крарин рекьяй министерстводи  тешкилайди я.

Чи мухбир