25-июндиз Сулейман-Стальский районда “Куьре — 2019. Регьберрин несил” лишандик кваз жегьилрин чирвилерин Международный форум шад гьалара ачухна. Район тешкилайдалай инихъ 90 йис тамам хьунихъ галаз алакъалу авунвай и мярекат Цмуррин СОШ-дин бинедаллаз кьиле тухузва.
Форум ачухдайла рахай Дагъустан Республикадин милли политикадин ва динрин крарин рекьяй министр Энрик Муслимова, кьилди къачуртIа, лагьана: “Куьре — 2019. Регьберрин несил” лишандик кваз форум тешкилнавай ва ана иштиракзавай гьуьрметлу ксар! За Дагъустан Республикадин милли политикадин ва динрин крарин рекьяй министерстводин тIварунихъай ва кьилди жуван патай куьн тебрикзава.
Жегьилрин чирвилерин форумар тешкилунин тереф гегьеншдаказ хуьзва. Им шад жедай кар я. Къе ина, Сулейман-Стальский райондани, “Куьре — 2019. Регьберрин несил” лишандик кваз цIийи, метлеблу ва лап итижлу проект кардик кутазва.
Форум Сулейман-Стальский район патал лишанлу вахтунда ада вичин 90 йисан юбилей къейдзавай йисуз кьиле физва. Алатнавай и девирда район яшайишдинни экономикадин жигьетдай хкажунин, муниципальный тешкилатдин мулкарал яшамиш жезвай халкьарин адетар, руьгьдин ва медениятдин ирс хуьнин ва артмишунин рекье аваз фена. Районда гражданвилин общество вилик финиз рехъ ачухзавай асул къуват чпелай цIийи фикирар теклифиз, гележег авай цIийи жуьрейрин проектар майдандиз акъудиз алакьзавай жегьилар я. “Куьре — 2019. Регьберрин несил” форумни абурун чалишмишвилерин нетижада тешкилиз хьанва. Форумди адан иштиракчияр патал гегьенш мумкинвилер ачухун, ам бажарагълу, жуьрэтлу рушар ва гадаяр гуьруьшмиш жедай, абуру бегьерлу рахунар кьиле тухудай надир майдандиз элкъуьн герек я.
Куь жанлу, кьетIен жуьредин проектди Россиядин жуьреба-жуьре регионрай ва къецепатан уьлквейрай тир яратмишунардай, жуьрэтлу, кIвенкIвечи жегьилар Сулейман-Стальский райондин мугьманперес чилел агудна.
Зун инанмиш тирвал, форум тухузвай йикъара куьне вахт менфятлудаказ кечирмишда, руьгьдин, пешекарвилин жигьетдай хкаж хьун патал цIийи мумкинвилер ачухда. Заз квехъ итижлу гуьруьшар ва къени крар хьана кIанзава!”
“Лезги газетди” виликдай гьеле хабар гайивал, форум 28-июндалди давам жеда. Ана саки 150 касди, гьа гьисабдай яз райондай тир 50 делегатди ва Азербайжандай, Афгъанистандай, Туркменистандай, Египетдай, Кот-Д-Ивуардай, Россиядин са жерге регионрай ва Дагъустандин шегьеррай тир 100 кас делегатри — мугьманри иштиракда.
Мярекатда иштиракун патал культурадин, образованидин, спортдин деятелар ва чIехи карчияр атун гуьзлемишзава. Форумдин сергьятра аваз лезгийрин хуьрекриз, гамар, халичаяр хрунин сеняткарвилериз, лезги тапракар гьазуруниз, путар хкажунин спортдиз талукь ва са жерге маса рекьерай мастер-классар кьиле тухуда, чирвилер гудай ва месэлаяр веревирддай махсус майданар, спортдин къугъунар ва культурадин мярекатар тешкилда.
Форумдиз гьазурвал акунин ва ам кьиле тухунин жигьетдай тешкиллувилин комитетдин заседание хьана. Анал мярекатдиз гьазурвал акунихъ ва мугьманар кьабулунихъ галаз алакъалу месэлаяр веревирдна.
Райондин кьил Нариман Абдулмуталибова и форумдин важиблувал къейдна ва гьар са касдиз и мярекатдив жавабдарвилелди эгечIуниз эвер гана.
“Вичин чIехивилел ва вич тухунин еридал гьалтайла, форум, иллаки райондин 90 йисан юбилей къейдзавай йисуз, райондин агьалияр патал лишанлу вакъиа хьун герек я. Ада жегьилри санал кIвалахунин адетар кутадай, дуствилин алакъаяр гегьеншардай ва мягькемардай мумкинвал гуда”, — къейдна райондин кьили.
Имам Яралиеван мергьяматлувилин “Умуд” фондуни и мярекат кьиле тухунихъ галаз алакъалу са кьадар харжияр вичин хивез къачунва.
«Лезги газет»
