Инвестицийрин такьатар бес тахьун ва кредитар желбдай чIавуз четинвилер ацалтун — ибур Дагъустанда промышленность вилик тухуниз кьецI гузвай асул месэлаяр я. Идан гьакъиндай 25-июндиз Владимир Васильева Махачкъалада кьиле фейи Россиядин промышленность вилик тухунин Фондунихъ галаз санал кIвалахунин рекьяй форумдал-семинардал малумарна, хабар гузва ТАСС-ди.
“Алай вахтунда чина промышленностди вичин мумкинвилер лазим тир дережада кардик кутазвач. Идахъ хейлин себебарни ава. Чун кIевера твазвай кьилин месэла инвестицийрин ресурсар бес тахьунихъ, кредитрин такьатар желбдай бес кьадардин мумкинвилер авачиз хьунихъ, промышленностда инвестицийрин проектар кьилиз акъудун четин хьунихъ, продукция маса гудай бес кьадар шартIар тахьунихъ галаз алакъалу я”, — лагьана В.Васильева. Региондин кьили рикIел хкайвал, 2019-йисалай Дагъустанда республикадин промышленность вилик тухудай Фонд кIвалахдив эгечIнава. Промышленностдин хиле инвестицийрин эвелимжи нубатдин проектрин — промышленность вилик тухунин Фондунин заемар кьезил шартIаралди къачун патал тайинарнавай проектрин сиягь гьазурнава. Сифтегьан нетижаяр гьеле хьанва — саки кьве гьафте идалай вилик чна инвестпроектрикай сад — “Мушарака” ЗАО (“Арматурайрин продукция гьасилдай производство”) — хвена. Адаз промышленность вилик тухунин центральный Фондуни къуват гана ва ам кардик кутун патал пулдин такьатарни чара ийида”, — къейдна В.Васильева ва карханадиз 50 миллион манатдин кьадарда аваз кьезил шартIаралди кредит чара авунин меслятдал атанвайди алава хъувуна.
Дагъустандин руководителдин гафаралди, алай вахтунда республикадин машинар акъуддай комплексдин хейлин карханайрихъ лап вини дережадин технологийрин асул кIватIал ва лазим дережадин кадрияр ава. “Чи карханайривай машинар акъуддай продукциядин барадай 18 миллиард манатдин къимет авай заказар кьилиз акъудиз жеда”, — алава хъувуна ада.
«Лезги газет»
