Вичин ери-бине Ахцегь райондин КIу­рукI­нарин хуьряй тир  Низам  Вердиевич  Шахбанов  Махачкъала шегьердин 13-нумрадин гимназияда гзаф йисарин тежриба авай чешнелу муаллимрикай сад я. 1969-йисалай инихъ гимназияда чирвилерни тербия гузвай ада вич кар алакьдай педагог тирди къалурнава. Яргъал вахтунда военруквиле, школадин гражданский оборонадин штабдин начальниквиле, ОБЖ-дин ва тарихдин тарсарин муаллимвиле кIвалахай адаз тарсар гунин методика лап хъсандиз чида.

Низам  Вердиевича чIехи юлдашди хьиз, аялриз кIелунра ацалтзавай четинвилер алудиз куьмекзава. Школьникри адан гьахълувилин, куьмекдиз къвез гьазурвилин, дуствилин алакъаяр хуьнин ерийриз виниз тир къиметни гузва. Н.Шахбанова гимназияда алай аям­дин вири истемишунриз жаваб гузвай ОБЖ-дин кабинет яратмишнава. Гзаф йисара 13-нумрадин гимназия Махачкъала ше­гьер­дин Советский райондин школаяр патал бинединди тир. Ина ДГПУ-дин студентар сиф­тегьан аскервилин гьазурлухвилин ре­кьяй­ педпрактикада жезва. Гимназияда ДИПКПК-дин къвалав гвай пешекарвал хкаждай курсара кIелзавай муаллимар патал ачух тарсар кьиле тухузва.

Н.Шахбанова жегьил-жавнриз аскервилинни ватанпересвилин тербия гунин рекьяй тухузвай кIвалах тариф авуниз лайихлу я. Ада школадин Женгинин Баркаллувилин му­зей патал еке материал кIватIнава. Гимназия­да кIелзавайбуру “Жергедин къуллугъдиз къабил я”, “Зарница”, “Орленок”  аскервилинни спортдин къугъунрани акъажунра активвилелди иштиракзава. Шегьердин ва республикадин сергьятра кьиле тухузвай и серенжемра абуру гьамиша кIвенкIвечи чкаяр кьазва­.

Низам Вердиевичан руководстводик кваз гимназиядин ученикри гел жагъурунин еке кIвалах тухузва. Абур “Ваз Ватанди ихтибарзава” клубдин членар я. Н.Шахбанов Махачкъала шегьердин Советский райондин ве­теранрин советдин ва ТОКС-дин штабдин член я.

Алай вахтунда Низам Вердиевич физический культурадин ва ОБЖ-дин месэлайрай Дагъустандин образование вилик тухунин институтдин экспертный комиссиядин член, Махачкъаладин ОБЖ-дин муаллимрин секциядин методист, РД-дин ветеранрин Советдин президиумдин член я. Жегьилрин ара­да тербиядин еке кIвалах тухузвай Н.Шахбанова конкурсар, Ватандин ЧIехи дяведин ветеранрихъ галаз гуьруьшмишвилер тешкилзава. Гимназиядин “Яру Армия” тIвар алай командади “И кар, юлдаш, рикIелай ракъурна виже къведач” конкурсда 1-чка кьуна. “Гъалибвилин ирсдарар” тIвар алай Вирироссиядин аялринни жаванрин тарихдинни ватанпересвилин акциядин муниципальный этапда иштиракунай лагьайтIа, гимназиядин команда 1-дережадин Дипломдиз лайихлу хьана.

2018-йисан ноябрдиз хизан, дидевал ва аялдин ихтиярар хуьнин рекьяй Дагъустандин Кьилин къвалав гвай векил Марина Ежова, РД-дин жегьилрин крарин рекьяй министр Камил Саидов, Махачкъаладин военный комиссар Муртуз Идрисов Н.Шахбанова тухвай ОБЖ-дин тарсариз фена ва абуруз еке къимет гана. Эхиримжи йисара Низам Вердиевичан ученикри Дагъустандин тарихдай кьиле тухузвай шегьердин ва республикадин олимпиадайра ва ОБЖ-дин тарсара 1 ва 2-чкаяр кьазва. “Гележегдиз кам” тIвар алай илимдинни практикадин конференцияда ам кьиле авай командади 1-чка кьуна.

Низам Вердиевичан руководстводик кваз аялри “Ваз Ватанди ихтибарзава” клубдин кIва­лахда активвиледи иштиракзава. Адан гъилик­ чирвилер къачур ученикар гьар йисуз военный училищейрик экечIзава. Ада шегьердин военрукрин методобъединенидизни регьбервал гузва. Низам Вердиевичан тежриба Дагъустандин муаллимрин пешекарвал хкаждай институтди умумиламишнава.

Муаллимвилин рекьяй Н.Шахбанован саки 50 йисан гьакъисагъ зегьмет хейлин шабагьралди къейднава.

Чаз жегьилриз ватанпересвилин тербия гузвай муаллимдихъ чандин сагъвал ва кIва­лахда мадни агалкьунар хьана кIанзава!

Нариман Мамедов