Чна ЧIехи Гъалибвилин 74 йисан сувар къейдна.
Йисалай-суз чна Гъалибвилин сувар са тIимил сефилвал кваз хьиз къаршиламишзава, гьикI хьи, гъиле яракь кьуна, душмандиз ягъунар кьур, барутдин ни галаз хтай ветеранар чи арайра саки амач. Идалайни гъейри, абурун веледрин — дяведин йисарин аялрин — жергеярни яваш-яваш кьери жезва. Дяведин ва адалай гуьгъуьнин четин йисара абурун руфуна тухдалди фу, тандал чими партал хьанач. Зунни, гзаф масабурни абурун жергедай я.
Гьукуматди дявейрин ветеранриз вичивай жедайвал куьмекар авурди я, исятдани ийизва. Гьа са вахтунда дяведин йисарин аялризни куьмекунин месэла Госдумадал гьялдайвал хьанай. 2016-йисуз гъилени кьунай. Амма арадал атай затI хьанач.
2016-йисуз Госдумадал и месэла гьялиз гатIуннай, амма, куьтягь тавуна, Госдумадин депутатар рухсатриз фенай. Миллер, Чубайс хьтин варлуйри и кардал хъуьруьнар, зарафатарни ийиз хьанай. “Правда” газетдиз абурун хъуьруьнар къалурзавай шикилни акъатнай.
Гьа са вахтунда дяведин аялрин патахъай В.В.Путина къул чIугур “О детях войны” законни ава. Ана абурун пенсийрал 1000 манат алава хъувун къалурнава. Бязи областра, крайра, месела, Ростовдин областда, Дальний Востокдин крайда чпин бюджетрай 500-600 манат гунни ийизва. Амма Госдумадивай и важиблу месэла къени гьялиз хьанвач, заседанийрал са гафни лугьузмач, рикIелни аламачир хьиз я. Перестройкадин вахтундани дяведин йисарин аялри четинвилер тIимил гьисснани бес?Уьлкведин 5 процент ксарин гъиле 82,5% девлет ава. Им бес акьалтIай гьахъсузвал тушни? Германияда лагьайтIа, къе дявейрин йисарин аялриз пенсияр яз чи пулуналди 50 агъзур манат гузва! Яраб лугьузва за, гила кьванни чал нубат къведатIа?
Райсудин Набиев
