И йикъара Кьурагь райондин администрацияда лезгийрин къагьриманвилин «Шарвили» эпосдин республикадин суварин гьазурвилер акунин гьакъиндай тешкиллувилин комитетдин заседание кьиле фена. Идакай «Лезги газетдиз» райадминистрациядин пресс-къуллугъди хабар гузва.

Заседание райондин кьил Замир Азизова кьиле тухвана. Райондин кьилин заместитель Махач Хариева тешкиллувилин комитетдин векилар сувариз талукь мярекатар патал гьазурнавай пландихъ галаз танишарна. Ада суварин мярекатра райондин векилри лайихлудаказ, тешкиллудаказ иштиракун лазим тирди къейдна.

Медениятдин ва туризмдин центрадин начальник А.Будаева суварин юкъуз Ахцегьа Кьурагь райондин майдан тадаракламишунин гьакъиндай ихтилатна. Ада малумарайвал, майданар тешкилунин гьакъиндай гьелелиг агакьнавай къарар авач. Райондин дестеди сувариз хъсандиз гьазурвилер акун патал бязи теклифар печатдинни информациядин технологийрин центрадин начальник Д.Халикьова, муниципалитетдин кьилин къвалав гвай агъсакъалрин советдин председатель Ф.Мирзоева, хуьрерин поселенийрихъ галаз кIвалахунин рекьяй райадминистрациядин векил Э.Исаевади, райондин спортдин ва жегьилрин крарин отделдин начальник Р.Рамазанова ва масабуруни гана.

Райондин кьили тешкиллувилин комитетдин векилрал суварик фидайбур тухудай улакьрин месэла виликамаз гьялун, делегациядик квайбурун сиягь туькIуьрун, мярекатрин пландин вири пунктар тамамарун тапшурмишна.

«Лезги газет»