Алатай гьафтеда РД-дин здравоохраненидин министр Жамалудин Гьажиибрагьимов П.А. Герценан тIварунихъ галай онкологиядин институтдин кар алай пешекаррихъ галаз гуьруьшмиш хьана. Делегациядик институтдин директордин заместитель Юрий Самсонов, илимдин чIехи къуллугъчи Инна Дрошнева ва химиотерапевт Анна Пайчадзе квай. Москвадай пешекарар Дагъус­тандин агьалийриз онкологиядин рекьяй гьихьтин куьмек гузватIа ахтармишун патал атанвай. Гуь­руьш­дал республикада и ре­кьяй кьиле тухузвай кIва­лахди­кай, кьилди къачуртIа, Да­гъустандай уьлкведин маса регионриз физ­вай азарлуйрин кьадар тIимил хьун патал кьабулзавай серенжемрикай лагьана.

Ж.Гьажиибрагьимован гафарай малум хьайивал, Да­гъустанда медидарайрин мате­риально-технический база хъсанарун, гьакI духтуррин пешекарвал хкажун патал инлай кьулухъни ча­лишмишвилер артухарда. Юрий Самсонова Герценан тIва­рунихъ галай институт и жи­гьет­дай алакьдай вири жуьредин ­куьмекар гуз гьазур тирди къейдна. ИкI, кIвалах фадлай кьиле тухузва, чи республикадин пешекарри жуьреба-жуьре конференцийра, семинарра чирвилер, онлайн-консультацийрикай менфят къа­чузва­. Идалайни гъейри, 10-дав агакь­на студентар радиологиядай республикада хъсан пешекарар хьунин макьсаддалди и рекьяй сифте­гьан гьазурлухвал къачун патал Герценан институтдиз рекье тунин жи­гьетдай икьрар хьанвай.

Гуьруьшдал онкологиядин гьар са дуьшуьшдикай ва сагъарун патал кьабулнавай серенжемрикай делилар къалурнавай картотека (онкологический регистр) хъсанаруниз, азарлуяр санай-масаниз рекье тун тешкилуниз ва онкодиспансердин диагностический база мягькемаруниз талукь месэлаярни къарагъарна. Анал къейд авурвал, цIи онкодиспансердин патав лучевой диагностикадин блок эцигунив эгечIда. Пуд мертебадикай ибарат тир дараматда МРТ-дин (магнитнорезонансная томография), МСКТ-дин (мультиспиральная компьютерная томография), маммографиядин, рентгендин ва маса аппаратрикай менфят къачуз жеда.

Гуьгъуьнлай мугьманар республикадин онкодиспансердин кIва­лахдихъ галаз таниш хьана. Абуруз гьакIни эцигзавай цIийи ­корпус къалурна. Анал кIвалахар ­акъвазна 10 йисалай виниз тир. ЦIи абурал “чан ахкьалтна”, Дагъустандин Кьил Владимир Васильеван тIалабунилай кьулухъ федеральный центрадай ам эцигна акьалтIарун патал пулдин такьатар чара авунва. 40 койкадин чка­яр­ авай анаг и мукьвара ачухун пландик ква. Пешекарар корпусдиз ва виниз тир дережадин тадаракриз килигна. Республикадин он­кодиспансердин патав эцигзавай, са сменада 200 кас кьабулиз жедай поликлиника акурла, мугьманри чпин разивал къалурна. ЦIийи объектри республикадин азарлуйриз махсус куьмек гун хъсанардайди къейдна.

Чи мухбир