И йикъара Сулейман-Стальский райондин кьил Н.Абдулмуталибов райадминистрациядин са жерге жавабдар къуллугъчиярни галаз Вини СтIалрин хуьре Ватандин ЧIехи дяведа иштиракай ватанэгьлияр рикIел хкунин обелиск цIийи хъийизвай чкадал фена. Идакай «Лезги газетдиз» райондин администрациядин пресс-къуллугъди хабар гана.

Вичин хайи ватанда дяведин иштиракчийриз эцигнавай гуьмбет цIийи хъувунин кардик кьил кутурди меценат Пирмегьамед Балакеримов я. Алай вахтунда гуьмбет хъсан хъувунин ва адан къвалав гвай ял ядай багъ абадунин кIвалахар кьиле физва. Ял ядай багъ парудалди кIевунин, ана экв тунин, къацу авунин ва ацукьдай куьсрияр туькIуьрунин месэлаяр фикирдик ква.

Чешмеди къейдзавайвал, меценатдиз вири и кIвалахар 7 миллион манатдай акъвазна. Ял ядай багъдин сергьятра авай музейдин тIвар куьчеда райондин администрациядин патай къир цадайвал я.

Чкадал фена кIвалахар кьилиз акъудзавай гьалдиз килигайла, ихьтин важиблу кар гъиле кьунвай инвестордиз Нариман Абдулмуталибова чухсагъул малумарна.

Гуьгъуьнлай райондин кьили Вини СтIалрин хуьруьн администрациядин дараматда авай ФАП-дин помещенидин гьални ахтармишна.

«Лезги газет»