10-июндиз Кьурагь райондин администрациядин заседанийрин залда райондин кьил З.Азизован регьбервилик кваз нубатдин совещание кьиле фена. Идакай «Лезги газетдиз» райондин администрациядин пресс-къуллугъди хабар гузва.

Алатай гьафтедин кIвалахрин нетижайриз ва гъилевай гьафтеда кьилиз акъудна кIани тапшуругъриз талукь нубатдин совещанида райондин тешкилатринни идарайрин жавабдар къуллугъчийри иштиракна.

РД-дин ФНС-дин 2-нумрадин МРИ-дин инспектор Секинат Къарахановади гьафтеда кIватIай налогрин гьакъиндай ва и хиляй яз руководителри кIвалахар хъсанвилихъ тухванвайдакай малумарна.

Финансрин отделдин начальный Б.Ибрагьимова май ва июнь варцарин мажибар, муаллимрин рухсатрин такьатар авайдакай, амма, образованидин отделдай талукь тир документар агакьар тавунвайвиляй абур гьелелиг чара ийиз тахьанвайдакай хабар гана.

«Муниципальный, бюджетдин ва казенный идарайрин централизованный бухгалтерия»  МБУ-дин директор Р.Асланова къейд авурвал, ругуд мектебдин работникриз мажибар ва рухсатрин такьатар чара авунва. Муькуь мектебри вахтунда приказар агакьар тавунвайвиляй абуруз пулдин такьатар янавач.

Совещанидал ЦРБ-дин кьилин духтур А.Азимов, райондин ЖКХ-дин директор М.Османов ва масабур рахана.

Эхирдай райондин кьили талукь ксариз райондиз гьахьдай чкадал алай стела къайдадик кухтунин тупшуругъ гана.

«Лезги газет»