И йикъара Сулейман-Стальский райондин Вини СтIалрин мектебда ва 1-нумрадин ДЮСШ-да волейболдай машгьур спортсмен Велибег Ягъибегов рикIел хкуниз талукьарнавай, адетдиз элкъвенвай районрин уртах турнир 13-сеферда яз кьиле фена. Идакай «Лезги газетдиз» райондин администрациядин пресс-къуллугъди хабар гана.

Турнир тешкилайбур райондин администрация, спортдинни жегьилрин крарин рекьяй комитет ва Ягъибеговрин хизан я. Акъажунар кьиле фейи мярекатда райондин администрациядин, жемиятдин тешкилатрин векилри, Велибег Ягъибеговрин мукьва-кьилийри ва волейболдал рикI алай маса ксари иштиракна.

Мярекат райондин кьилин сад лагьай заместитель Л.Оружева ачухна. Ада районда гьар йисуз кьиле тухузвай спортдин акъажунрихъ авай метлеблувал, ихьтин мярекатар кьиле тухуналди жегьилрин арада спорт машгьур авунин важиблувал къейдна.

Велибег Ягъибегован багърийрини ихьтин турнир тешкилзавайбурун адресдиз разивилинни алхишдин келимаяр лагьана.

Санлай къачурла, и йисуз 7 командади волейбол къугъунай чпихъ авай устадвал къалурна. Абурун жергедай Каспийск шегьердин, Хив райондин АрхитIрин, Мегьарамдхуьруьн райондин Советский хуьруьн, Агъа СтIалрин, Кьулан СтIалрин, Вини СтIалрин, Курхуьруьн ва 1-нумрадин ДЮСШ-дин командаяр авай.

Турнирдин нетижада Курхуьруьн команда гъалиб хьана. Кьвед лагьай чка Кьулан СтIалрин ва Вини СтIалрин, пуд лагьай чка Агъа СтIалрин ва кьуд лагьай чка Каспийск шегьердин командайри кьуна. Абуруз кубокар, дипломар, къиметлу савкьатар ва пулдин пишкешар гана.

«Лезги газет»