6-июндиз кьиле фейи Петербургдин международный экономикадин форумдин сергьятра аваз Дагъустандин кьил Владимир Васильева ва Россиядин Почтадин генеральный директор Николай Подгузова сада-садахъ галаз алакъалувилелди кIвалахунин гьакъиндай тир икьрардал къулар чIугуна ва гележегда кIвалах вилик тухунин месэлаяр веревирдна. Идакай «Лезги газетдиз» «Дагъустан» РИА-ди хабар гузва.
Саналди ийидай кIвалах федеральный почтадин алакъаяр еримлу авунихъ, лазим тир къайдадик кутунихъ ва республикадин мулкара халкьдиз ийизвай къуллугъдин ери хкажунин макьсадрихъ элкъуьрда.
Веревирдер кьиле фейи вахтунда кьве терефдини Дагъустандин халкьар, иллаки къерехра авай хуьрерин агьалияр почтадин регьят ва мукьвал къуллугъдалди таъминарунин месэлаяр къарагъарна.
Къулар чIугунвай меморандумда Россиядин Почтадин ва Дагъустандин гьукуматдин органрин векилрин иштираквал авай рабочий десте арадал гъунин гьакъиндай къалурнава. Рабочий дестедин кьилин тапшуругъ саналди кIвалахунин ва региондин мулкара почтадин алакъа вилик тухунин кар алай месэлаяр веревирдуникай ибарат жеда.
«Лезги газет»
