3-июндиз Кьурагь райондин администрацияда райондин кьил З.Азизова кьиле тухвай совещанидал зирзибилар ва яшайишда арадал къвезвай маса амукьаяр кIватIунин ва гадарунин месэла веревирдна.
«Лезги газетдиз» райадминистрациядин пресс-къуллугъди хабар гайивал, совещанида хуьрерин кьилери, «Экологи-ка» ООО-дин директор Альберт Черникова, и тешкилатдин чIехи инспектор Ислам Исмаилова ва зирзибилар тухунин рекьяй Кьурагь райондин инспектор Рамис Рустамханова иштиракна.
Мугьманри чпин рахунра къейд авурвал, зирзибилар кIватIунин, тухунин ва гьялунин гьакъиндай кьабулнавай Федеральный къанун райондин мулкара рази тежедай жуьреда кьилиз акъудзава. Малум хьайивал, цIийи къайда бегьемдиз кардик акатнавач. Кьилди къачуртIа, хуьрерин кьилерихъ галаз талукь тир икьрарарни кутIуннавач. Агьалияр зирзибилар тухунин къуллугъдай гьакъи гуникай къерех жезва.
Совещанидин вахтунда иштиракчийри мугьманриз суаларни гана. Райондин кьил Замир Азизова совещанидин нетижаяр кьуналди, къейд авурвал, инспекторри хуьрерин кьилерихъ галаз талукь тир икьрарар кутIунна, зирзибилар тухудай вахт тайинарун герек я.
«Лезги газет»
