Мегьарамдхуьруьн райондин кьил Фарид Агьмедова япариз зайифдиз ван къвезвайбурун арада самбодай кьиле фейи Россиядин чемпионатда гъалиб хьайи Назим Саидов тебрикна. Идакай «Лезги газетдиз» райондин администрациядин пресс-къуллугъди хабар гузва.

«Инанмишвилелди ва викIегьвилелди виликди фин патал абуруз чна куьмек гун гзаф важиблу месэла я. За чи жегьил спортсмен Назим Саидоваз 57 килограммдин заланвилин дережада Россиядин чемпионвилин тIвар къазанмишун мубаракзава. Къуй адахъ мадни еке агалкьунар, дуьньядин дережада гъалибвилер хьурай!», — лагьанва Фарид Агьмедован тебрикда.

Къейд ийин, тIвар кьунвай акъажунар и мукьвара Зеленоград шегьерда кьиле фена. И гъалибвал Назим Саидова спортдин рекье къазанмишнавай сад лагьай агалкьун туш, ам спортдин рекье дурумлудаказ виликди физва спортсмен я.

«Лезги газет»