Са тIимил йикъар идалай вилик Московский областда тайский боксдай Россиядин кIвенкIвечивал патал кьиле фейи акъажунра Дагъларин уьлкведин хкянавай командадини иштиракна. Аник Хасавюрт райондин Къурушрин хуьре кардик квай ДЮСШ-да Малик Талибован гъилик вердишвилер къачузвай Темирлан Залов (14-15 йисарин категориядай) ва Эсмер Османовни квай. Турнирда уьлкведин 41 региондай тир 650-далай виниз спортсменри чпин устадвал къалурна…
Акъажунра 12-13 йисарин яшда авайбурун арада Эсмер Османова (34 кг) буьруьнждин медаль къазанмишна. Ада пуд бягьс кьиле тухвана.
Лугьун лазим я хьи, Россиядин дережадин турнирра чи ватандашди иштиракнавайди сифте сеферда тиртIани, им адан сад лагьай агалкьун туш. ИкI, йисан сифте кьиляй ада тайский боксдай Дагъустандин Кубокни къазанмишна. Ам спортдин и жуьредай Дондал алай Ростов шегьерда кьиле фейи СКФО-дин ва ЮФО-дин кIвенкIвечивал патал акъажунра къизилдин медалриз лайихлу хьана. Ада жуьреба-жуьре турниррани кIвенкIвечи чкаяр кьуна.
Чаз малум хьайивал, Эсмер Османов тайский боксдал машгъул жез 3 йис я. Адан агалкьунрик тренер Малик Талибован лайихлу пайни ква. Чи мурад жавандихъ мадни еке агалкьунар хьун я.
Чи мухбир
