Мукьвара Волгоград шегьерда, кьве сеферда Европадин чемпион, спортдин международный классдин мастер Евгений Погорелов рикIел хуьнин лишан яз, дзюдодай Вирироссиядин 15-турнир кьиле фена. Ана Воронежский, Ростовский, Саратовский, Самарский, Ульяновский, Волгоградский областрай, Адыгеядай, Краснодарский крайдай, Дагъустан, Калмыкия, Мордовия, Чечня, Кеферпатан Осетия-Алания, Къарачаево-Черкесия республикайрай, Москва, Ставрополь шегьеррай тир 200-дав агакьна спортсменри иштиракна. Абурун арада Сулейман-Стальский районда кардик квай дзюдодин ва самбодин ДЮСШ-да вердишвилер къачур, алай вахтунда Махачкъала шегьерда къайдаяр хуьдай органра къуллугъзавай алидхуьруьнви Аслан Къурбановни (шикилда) авай. Ада 90 кг-дин заланвал авайбурун арада вичин къуватар ахтармишна.
ИкI, ада Дата Хужаеван (Адыгея), Тимур Магьмудован (Волгоград), Заур Тагъиеван (Чечня), Заур Гьасанован (Дагъустан) ва финалдани Глеб Шумилован (Самара) винел инанмишвилелди гъалибвал къазанмишна.
Вичин заланвилин категориядай турнирда иштиракай 16 спортсмендин арада Аслан Къурбанова 1-чка кьуна. Идалайни гъейри, РФ-дин спортдин мастер А.Къурбанов турнирда виридалайни хъсан спортсмен язни гьисабна. Адаз медаль, Кубок, пулдин пишкеш гана.
РикIел хкин: А.Къурбанов универсальный бягьсерай (лайт) са шумуд сеферда Россиядин, Европадин ва кьуд сеферда дуьньядин чемпион, дзюдодай Россиядин Кубокдин, самбодай дуьньядин Супер Кубокдин (2017-йис) сагьибни я.
Чна машгьур спортсменар акъатай Къурбановрин сихилдин кар уьзягъдаказ давамарзавай, райондин ва хайи халкьдин тIвар хкажзавай Асланахъ спортда мадни чIехи агалкьунар хьун алхишзава.
Хазран Кьасумов
