Дагъустандинни “Россиядин ракьун рекьер” ОАО-дин арада транспортдин барадай санал кIвалахунин гьакъиндай гъилевай йисан февралдиз Сочида хьайи Россиядин инвестиционный форумдин сергьятра аваз къулар чIугур икьрар кьилиз акъудуниз талукь месэлайриз кьетIен фикир гана. РикIел хкин, саналди тир кIва-лахдин кар алай терефрик транзитный парар дашмишунин, пассажирар тухунин кIвалах хъсанарун патал ракьун рекьерин къурулуш цIийи хъувунин, транспортдин хатасузвал таъминарунин месэлайриз артух фикир гузва.
Владимир Васильева санал кIвалахунин важиблувал къейдна.
Саналди тир кIвалахди гузвай хъсан нетижайрикай Владимир Пястоловани лагьана: “Чна РД-дин Гьукуматдихъ, РД-дин Минтрансдихъ галаз лап хъсан еришар аваз санал кIвалахзава. Дагъустандин ракьун рекьин работникрин кIвалахдикай рахайтIа, тухузвай пассажиррин, дашмишзавай парарин кьадар артух жезва. И делил, алатай йисан дережадив гекъигайла, 23 процентдин артух жедайвал я. Республикада ракьун рекьерин транспортдай ичIирзавай парарин кьадарни артух хьана. Чаз аквазвайвал, РД-дин Гьукуматдин чалишмишвилерин нетижада шегьеррин патарив гвай чкайриз тухузвай пассажиррин кьадар гзаф жезва”.
Гуьруьш кьиле фидай чIавуз мадни къейд авурвал, Дагъустандин мулкунал РЖД-дин къурулушдик акатзавай подразделенийра саки 2005 касди кIвалахзава. Вири работникриз вахт-вахтунда мажибар гузва ва абуруз яшайишдин къулай шартIар тешкилун заминламишнава.
Агьалияр кар-кеспидик кутунин темадай ихтилат давамарун яз, Владимир Пястолова алава хъувуна: “Икьрар ва серенжемрин план кьилиз акъудунихъ галаз алакъалу яз чна кIвалахдин чкайрин кьадар артух хьун гуьзлемишзава. Сифте нубатда поездра аваз тухузвай пассажиррин кьадар артухарун фикирдиз къачунва. Алай йисуз чахъ поездар Бакудиз финин барадай лап цIийи жуьредин расписание жеда. Чун зулухъ “Махачкъала-Баку, йифен экспресс” международный маршрут ачухунин патахъай икьрардал атанва. Республикадин агьалийривай, мисал яз, йифен сятдин 8-даз Махачкъалада вири къулайвилер авай вагондиз акьахиз ва пакамахъ сятдин 7-даз хьиз, Бакуда поезддай эвичIиз жеда”.
Гуьруьшда РД-дин Гьукуматдин Председателдин Сад лагьай заместитель Гьажимегьамед Гьуьсейновани иштиракна.
«Лезги газет»
