27-майдиз Москвада Дагъустан Республикадин Кьил Владимир Васильев Россиядин Федерациядин хуьруьн майишатдин министр Дмитрий Патрушевахъ галаз гуьруьшмиш хьана.
РД-дин Кьилин ва Гьукуматдин Администрациядин пресс-къллугъди хабар гузвайвал, гуьруьш кьиле физвай чIавуз Дагъустандин агропромышленный комплекс вилик тухунин асул пуд тереф — прунзчивални мелиорация, хипехъанвал ва къецепатан уьлквейриз лапагдин як маса гун, гьакIни гьайванрин жинс хъсанарун ва тумчивал — виликди тухунин месэлаяр веревирдна. Республикадин мулкунал “Майвачивилин федеральный илимдин центр” ФГБНУ-дин филиал ачухунин меслятдал атана. Терефри республикадин прунзчияр целди ара атIунар авачиз таъминарунин игьтияжар фикирда кьуналди Каргалинский гидроузелдин затворар идара авунин къайда пайгардик кутунин, гьакIни “АПК-дин продукция къецепатан уьлквейриз маса гун” федеральный проект кьилиз акъудунин сергьятра аваз, лапагдин як гьасилун патал гьайванар емдал эцигна куькардай майданар тешкилунин, емдин база мягькемарунин, Къизлярдин чIурар авай гьал хъсанарунин месэлаяр веревирдна.
Вири и месэлаяр, РФ-дин хуьруьн майишатдин министерстводин коллегиядин членар Дагъустан Республикадиз атайла, мадни мукьуфдивди веревирд авунин меслятдал атана. Дмитрий Патрушева и барадай РФ-дин хуьруьн майишатдин министерстводин жавабдар къуллугъчийриз талукь тир тапшуругъ гана. Дагъустан Республикадин хуьруьн майишатдин ва суьрсетдин министерстводал хипехъанвал вилик тухунин, къецепатан уьлквейриз маса гузвай лапагдин якIун кьадар артухарунин, прунзчивал ва мелиорация вилик тухунин программайрин проектар туькIуьрун тапшурмишна.
Гуьруьшда РД-дин Гьукуматдин вице-премьер — хуьруьн майишатдин ва суьрсетдин министр Абдулмуслим Абдулмуслимовани иштиракна.
«Лезги газет»
