ЧIехи уьлкведихъ, гьелбетда, яргъи сергьятарни жеда. ИкI, Россиядин Федерациядин сергьятарни дуьньяда виридалайни яргъибур я — 60 агъзур километрдилайни гзаф. Сергьятдал дапIар ала, гьавайда лугьузвайди туш. Чи госсергьятар пограничникри уяхдаказ хуьзва. Дагъустанда абурун лап еке дестейрикай сад ава. Абуру кьураматда — Гуржистандихъ ва Азербайжандихъ, Каспий гьуьлуьн майданрани Къазахстандихъ, Ирандихъ, Туркменистандихъ галаз авай сергьятрал къаравулвалзава — яни вири санлай 1048 километрда.
ФСБ-дин РД-да авай Погрануправление 1994-йисалай арадал къвез башламишна. Сергьятчийрин хиве лап жавабдар везифаяр ава. Месела, Каспий гьуьлуьн биоресурсар чуьнуьхунин, вара-зара авунин, сергьятдилай элячIунин къайдаяр чIурунин вилик пад кьун гьабурукай я. Регионда секин гьалар хьуник чи сергьятчийрин пайни ква.
28-майдиз Дербент шегьерда Россиядин ФСБ-дин Погрануправленидин къуллугъ арадал атана 95 йис тамам хьуниз талукьарнавай мярекат шад гьалара кьиле фена. Ана Дагъустан Республикадин Дербент шегьерда авай Россиядин ФСБ-дин Погрануправленидин къуллугъдин начальник, генерал-майор Поддубный Михаила, Дербент шегьердин кьилин заместитель Рустамбег Пирмегьамедова, Дербент райондин кьилин везифаяр тамамарзавай Сеидмегьамед Бабаева, Мегьарамдхуьруьн райондин кьилин заместитель Ариф Гьажиева, офицерри, прапорщикри ва масабуру иштиракна.
Поддубный Михаила погранчастуна къуллугъзавайбурун агалкьунрикай суьгьбетна, Россиядин Гьукуматдин итижар гьакъисагъвилелди хуьзвай аскерриз ва офицерриз сагърай лагьана.
Пешекарвилин сувар погранчастуна къуллгъзавайбуруз Рустамбег Пирмегьамедова, Сеидмегьамед Бабаева, Ариф Гьажиева ва СССР-дин пограничный кьушунрин ветеран, шаир, журналист Нариман Къарибова мубаракна. Н.Къарибова анал Россиядин погранчастара къуллугъзавайбуруз бахшнавай шиирни кIелна.
Ахпа Поддубный Михаила чешнеллудаказ къуллугъ авунай са жерге офицеррив ва прапорщикрив гьуьрметдин грамотаяр вахкана, Нариман Къарибоваз рикIел аламукьдай знак гана.
Шегьердин яратмишунрин коллективри сувариз талукьарнавай концерт гана. Ана гьакIни Погрануправленидин къуллугъдин кIвалахдиз талукь яракьрин ва военный техникадин шикилрин выставкани кардик квай.
Къагьриман Ибрагьимов
