Дидедиз

Азиз диде, вун тебрикиз
Атанва чун къе.
Чи рикlин сир ваз ачухиз,
АтIузва рекьер.

Хайи диде, чи кlанивал
Гьикl къалурда ваз?
Цуькверивди ацlай бустан
Багъишда хьи ваз.

Ви ширин сес галукьайла,
Шад жеда рикlиз.
На кlанивал багъишайла,
Рагъ жеда михьи!

Дуьз тербия гана на чаз,
Туна дуьз рекье.
Ваз чухсагъул, чан, лугьузва
Ви балайри къе.

«Лезги газетдин» 2019-йисан 21-нумрадай

______________________________________________

Йифен перде

 

Ахварал физ — тефизвай са ара тир.

Вацра ишигъ гуз гуьзел тир тIебиат.

Зи хиялар, гъам-хифетни пара тир,

Тек са кардал хьанвай зун лап аламат.

За къарагъна пенжер ахъа авуна,

Цавун тагъдиз зун рикIивай тамашна.­

Нур гуз, рахаз, хъуьрез гъетер акуна,­

Са гъед катна, ам далдадик акатна.­

Вили цавал экIя хьанвай гъетериз

Вацра вичин ишигъ багъиш авуна.

Ашукь хьанвай зун и кьулан йифериз,

Ахвари лап вичин патаз чIугуна.

Йифен чIулав перде гьа икI алатна,

Ракъини чин ачухзава къвердавай.

Берекатлу хиялар зав агатна,

Рушарни цел физвай югъни жердавай.

«Лезги газетдин» 2021-йисан 2-нумрадай

________________________________________________________________________