2010-йисуз Эминхуьре азаддаказ кьуршахар кьунай ДЮСШ ачухна. СССР-дин спортдин мастер, Къазахстан Республикадин лайихлу тренер Абдулнасир Мегьамедкеримов кьиле авай спортдин школадихъ алай вахтунда 8 филиал ава, анра 200-дав агакьна жаванрини жегьилри кьуршахар кьунай вердишвилер къачузва ва чпин устадвал хкажзава.
ДЮСШ-да вердишвилер къачур гзафбурукай тIвар-ван авай спортсменар, гьакI дуьньядин, Европадин ва уьлкведин чемпионатрин гъалибчиярни призерар хьанва. Эминхуьряй акъатай машгьур спортсменрикай яз, азаддаказ ва грекринни римлуйрин къайдада кьуршахар кьунай СССР-дин спортдин мастер, Вирисоюздин турниррин ва Украинадин чемпион рагьметлу Лазим Сайидован тIвар кьаз жеда. Ам рикIел хкунин лишан яз, мукьвара хуьре азаддаказ кьушахар кьунай 2-турнир кьиле фена. Ана райондин хуьрерай атанвай 100-дав агакьна жаван пагьливанри заланвилин 10 категориядай чпин устадвал къалурна. Иштиракчийрин арада республикадин ва Вирироссиядин чIехи турниррин, гьакIни Кострома шегьерда ва Къазахстанда кьиле фейи международный турниррин гъалибчиярни призерар авай. Акъажунарни къизгъиндаказ кьиле фена.
Турнирда 1, 2 ва 3-чкаяр кьурбуруз медалар, грамотаяр, гъвечIи кубокар гана. Са шумуд спортсмен махсус призриз лайихлу хьана.
Лазим Сайидован турнирдин тешкилатчийрихъ гележегда и турнир республикадин дережада тухудай фикир ава.
Хазран Кьасумов
