И мукьвара Къурушдал школайра кIелзавай аялрин ва чIехибурун арада спортдин кьвед лагьай акъажунар кьиле фена. Аниз къурушвийрилай гъейри, Дербентдай, Сабновадай, Ахцегьай спортсменар (санлай къачурла, 54 кас) атанвай. Иштиракчийри дагъдиз чукурунай, штанга гваз ацукьиз-къарагъунай, залан атлетикадай, гъилералди къекъуьнай, машин ялунай ва маса жуьрейрай, чIехибуру лагьайтIа, командайриз пай хьана, чпин алакьунар ва викIегьвал къалурна. Гаф кватай чкадал лугьун: Дербентдин ва Къурушрин хуьруьн командайрин арада бягьсер 5:6 гьисабдалди чкадин командадин хийирдиз акьалтIна.
Спортдин и акъажунар кьиле тухуз куьмек гайибурун жергеда ава: алишверишдин “Курейш” тIвар алай фирма, Фейруз Къулиев, Гьайдар Рамазанов, Казбек Эфендиев, Мустафа Къулиев, Тевекуьл Сулейманов, Кьасум Алимов, Рагьим Къулиев, Талиб Эюбов, Рамазан Сеферов, Бехруз Къулиев ва гзаф масабур. Акъажунар итижлудаказ кьиле фена. И жуьредин мярекатдин макьсад сагълам уьмуьр пропаганда авун, спортдин милли жуьреяр кIвачел ахкьалдар хъувун, гьакIни аялрик руьгь кутун, абуруз чпин къуватар гъвечIи чIавалай ахтармишдай мумкинвал гун я.
Къейд авун лазим я хьи, алатай йисав гекъигайла, цIи и акъажунриз спортсменар гзаф атанвай. Мярекатдин тешкилатчийрихъ и акъажунар къведай йисуз кьве сеферда, гьакIни Дагъларин уьлкведин жуьреба-жуьре пипIерай спортсменриз теклиф авуналди, кьиле тухудай ният ава.
Чи мухбир
