Аялрин бахчайра кIвалахзавай муаллимрин-тербиячийрин сагъламвал мягькемарунин, абур спортдал машгъул хьунал желбунин мураддалди, и йикъара Миграгъ-Къазмайрин хуьруьн аялрин бахчада райондин аялрин бахчайрин къуллугъчийрин арада спартакиада кьиле фена. 

Спортдин акъажунра райондин бахчайрай 60 муаллимди иштиракна. Абуру цIил ялунин, шешелда аваз чукурунин ва маса жуьредин акъажунра чпин къуватар алцумна.

Муаллимрин-тербиячийрин арада кьиле фейи акъажунриз райондин Информациядинни методикадин центрадин методистри – Тамара Муллинади ва Лейла Мухтаровади къимет гана.

Акъажунрин нетижада сад лагьай чкаяр Мискискарин «Солнышко» бахчадин ва Усугъчайдин «Чубарук» бахчадин командайри кьуна.

Кьвед лагьай чкадал Миграгъ-Къазмайрин «Бахчадин» ва пуд лагьай чкадал ЦIийи-Каракуьредин «Аленушка» бахчадин командаяр хьана.

Агалкьунар хьайи командайриз Докъузпара райондин ИМЦ-дин патай грамотаяр гана.

 «Лезги газет»